वीर व प्रसूती गृहया पुनःनिर्माण लिपांगु चरणय्

येँ – देय्या हे दकलय् पुलांगु अस्पताल वीर अस्पताल व थापाथलीइ च्वंगु प्रसूती गृहया मुख्य भवनया पुनःनिर्माण लिपांगु चरणय् थ्यंगु दु । थनिं प्यदँ न्ह्यः भुखाय् ब्वयाः क्षति जूगु वीर अस्पतालया छगू भवन व थापाथलीइ च्वंगु परोपकार प्रसूती गृहया भुख्य भवनया पुनःनिर्माण लिपांगु चरणय् थ्यंगु खः ।

अस्पताल प्रशासनं बिउगु जानकारीकथं निगुलिं अस्पताल करिब लछि लिपा संचालनय् हयेगुकथं तयारी जुयाच्वंगु दु । स्वास्थ्य तथा जनसंख्या मन्त्रालय मार्फत जापान सरकारया ग्वाहालिं अस्पतालया पुनःनिर्माण जुयाच्वंगु खः । आः पुनःनिर्माण जुयाच्वंगु देय्या दकलय् पुलांगु अस्पतालया भवनय् ९४ श्यया दुसा प्रसूती गृहया अत्याधुनिक मुख्य भवन १९२ श्ययाया खः ।

वीर अस्पतालया न्हूगु भवनय् नेफ्रोलोजी वार्ड, कार्डियोलोजी वार्ड व ग्यास्ट्रोलोजी वार्ड दइ । प्रसूती गृहया न्हूगु भवनं इमर्जेन्सी, डेलिभरी रुम, बर्थिङ सेन्टर, पोष्ट शल्यक्रिया वार्ड लगायतया सेवा बी । प्रसूतीया भवनया पुनःनिर्माण सिधयेधुंकूगु व आः आन्तरिक संरचना मिले यायेगु ज्या जक ल्यं दुगु अस्पताल प्रशासनं जानकारी बिउगु दु ।

राष्ट्रिय पुनःनिर्माण प्राधिकरणया प्रमुख कार्यकारी अधिकृत सुशील ज्ञवालीं पुनःनिर्माण जुयाच्वंगु निगुलिं अस्पतालया निरीक्षण यासें प्राधिकरणं भुखाय् लिपाया पुनःनिर्माणयात अवलम्बन यानागु व न्हापा स्वयां अझ बांलाक व बल्लाक निर्माण यायेगु अवधारणाकथं स्वास्थ्य संस्थाया पुनःनिर्माणया ज्या जुयाच्वंगु धयादिल ।

वीर अस्पतालया निर्देशक डा. केदार प्रसाद सेन्चुरीं अस्पताल भवनया पुनःनिर्माण लिपांगु चरणय् थ्यनेधुकूगु धासें आः औपचारिक उलेज्या यानाः विधिवत रुपं संचालनय् हयेगु जानकारी बियादिल । जापान अन्तर्राष्ट्रिय सहयोग नियोग (जाइकां) निगुलिं अस्पताल निगू अर्ब १० गू करोड लागतय् पुनःनिर्माण याःगु खः ।