वइगु शनिवाः टोस्टमास्टर्स सम्मेलन
येँ – नेपालय् टोस्टमास्टर्सया गतिविधि अप्वया वनाच्वंगु झ्वलय् वइगु शनिवाः होटल हिमालयय् न्हापांगु डिभिजन सम्मेलन यायेत्यंगु दु । सम्मेलनय् झिंप्यंगू क्लब व थ्यंमथ्यं निसःत्याम्ह दुजःतय्सं ब्वति काइगु जूगु दु । सम्मेनय् ब्वति काइपिं कर्पोरेटर, बैंकर, व्यवसायी, शिक्षक, पर्यटन उद्यमी, कार्यकारी अधिकृत, सल्लाहकारत लिसें मिडियापर्सन, कलेजया युवात जुइगु खँ धाःगु दु ।
सम्मेलनय् भारतया प्रतिष्ठित टोस्टमास्टर डा. राजदीप मनवानीं मू न्वचु बियादीगु व छगू सेसन संचालन नं यानादीगु खँ धाःगु दु । टोस्टमास्ट मनवानीं सन् २००८ निसें १२ तक व सन् २०१५ य् भारत व श्रीलंकाय् न्याक्वः तक उत्कृष्ट वक्ताया उपाधी कयादीधुंकूम्ह खः ।
ज्याझ्वलय् नेपाल टोस्टमास्टर्सया प्रतिष्ठीत जूरीं ल्यःपिं मिडिया व्यक्तित्व मध्ये छम्हेसित संचार पुरस्कार २०१८ नं लःल्हाइगु ज्याझ्वः दु । थज्याःकथं थ्व न्हापांगु पुरस्कार खःसा थ्व गैरटोस्टमास्टर दुजःयात बीगु पुरस्कार खः ।
नेपाःया डिभिजन एया फुक्कं मूल्यांकन व हास्य भाषण धेंधेंबल्लाया फाइनलिस्टतय्सं अन्तिम चरणय् प्रतिस्पर्धा याइसा निगुलिं धेंधेंबल्लाःया विजेतायात भारतया कोलकता वइगु आकिवं मे महिनाय् जुइगु जिल्लास्तरया प्रतिस्पर्धाय् ब्वति कायेकीगु जुइ । थ्व प्रतियोगितात टोस्टमास्टर्स इन्टरनेशनल पाखें निर्देशित दिशानिर्देश कथं व्यवस्थित जुइगु खँ धाःगु दु ।
अथेहे ज्याझ्वलय् छगू हल्का नोटय् टोस्टमास्टरया दुजःपिंसं थःगु प्रतिभा न्ह्यब्वइ । नेपाःया न्हापांम्ह वेंट्रिलोक्विस्ट, व नांजाःम्ह स्ट्याण्ड अप कमिक टोस्टमास्ट सिमा गोल्छां थःगु विशेष प्रतिभा नं न्ह्यबइगु ज्याझ्वः दु । नेपाःया डिभिजन निर्देशक, विशिष्ट टोस्टमास्टर रंजित आचार्यया कथं थ्व नेपालय् जुइत्यंगु आःतकया दकलय् तःधंगु टोस्टमास्टर इभेन्ट खः ।
वय्कलं थ्व ज्याझ्वः फ्यानफेयर लिसें ग्वसाः ग्वयेत्यनागु खँ कनादिसें नेपालय् क्लब व सदस्यतय् विकास खनाः उत्साहित जुयागु खँ कनादिल । एशोसियट क्लब विकासया निर्देशक टोस्टमास्टर सुमन शाक्यं धयादिल, ‘खुदँया दुने स्वंगू क्लबं झिंप्यंगू क्लब थ्यंगु दु ।
थ्व प्लेटफर्मय् न्यासःम्ह स्वयां मल्याक दुजःतय्सं लबः काये खंगु दु । जिमिसं वइगु दिनय् थ्व ल्याः अप्वःगु स्वये चाहे जुयाच्वनागु दु । नेपालय् सन् २०२० तकया दुने थःगु हे जिल्ला चायेकेगु दृष्टिकोण तयातःगु दु ।’
LEAVE YOUR COMMENTS