ने. सं. ११४४ कौलाथ्व षष्ठी -

ज्वनातःपिं त्वःतूसा विप्लव नं चुनावय् वइगु

येँ – गृहमन्त्री बालकृष्ण खाँड व नेत्रविक्रम चन्द नेतृत्वया नेपाल कम्युनिष्ट पार्टी (नेकपा) या प्रवक्ता खड्गबहादुर विश्वकर्मा दथुइ स्थानीय तह निर्वाचनय् ब्वति कायेगु बारे सहलह जूगु दु ।

गृहमन्त्रीयात नापलायेगु झ्वलय् नेता विश्वकर्मां थःपिं नं निर्वाचनय् ब्वति कायेत सकारात्मक जूगु खँ धासें निर्वाचनय् ब्वति कायेगु नितिं थीथी द्वपनय् जेलय् लानाच्वंपिं पार्टीया नेता कार्यकर्तातय्त त्वःतेमाःगु व उमित तयातःगु मुद्दा लित कायेमाःगु माग यानादीगु खः ।

लिसलय् गृहमन्त्री खाँणं कानुन कथं लित कायेजिउगु मुद्दा लित कायेगु प्रक्रिया न्ह्यायेधुंकूगु खँ धयादीगु खः । थ्वहे विषययात कयाः पटक–पटक जूगु वार्ता सकारात्मक जूगुलिं नेता कार्यकर्तातय्त त्वःतेगु ज्या अन्तिम चरणय् थ्यनेधुंकूगु खँ नं धाःगु दु ।

सहलहया झ्वलय् नेकपाया नेतातय्सं नेता कार्यकर्तातय्त जेलय् तयाः थःपिं निर्वाचनय् कुहां वयेबलय् असहज जुइगु धासें यदि थःपिंत नं निर्वाचनय् दुहां वयेगु वातावरण दयेकेगु खःसा दकलय् न्हापां नेता कार्यकर्तातय्त त्वःतेमाःगु व उमित तयातःगु मुद्दा लित कायेमाःगु शर्त न्ह्यथंगु खः ।

स्थानीय निर्वाचन यायेगु वातावरण सहज जुया वनाच्वंगु इलय् विप्लव नेतृत्वया पार्टीं नं चुनावय् ब्वति कायेगु इच्छा प्वंकाहःगु खः । थ्व स्वयां न्हापा पार्टी दुने स्थानीय तहया निर्वाचनय् ब्वति कायेगु वा मकायेगु धइगु बारे विवाद जूगु खः । तर आः वयाः न्हापा स्थानीय तहया निर्वाचनय् वने मजिउ धयाच्वंपिं नेतातय्सं नं थ्व चुनावय् ब्वति कायेमाः धायेवं नेकपाया नेतातय्सं प्रधानमन्त्री शेरबहादुर देउवा लगायतं सत्तागठबन्धनय् दुथ्याःगु माओवादी केन्द्रया अध्यक्ष पुष्पकमल दाहालयात नं नापलानाः खँ ल्हायेधुंकूगु दु ।