वुहानं उद्धार याःबलय् नं अनियमितता !
येँ -कोरोना भाइरस खनेदयेवं चीनया वुहानं नेपाली विद्यार्थीत उद्धार यानाहःबलय् तःधंगु अनियमितता जूगु खनेदुगु दु । नेपाली विद्यार्थीतय्त उद्धार यानाः झिंप्यन्हु क्वारेन्टाइनय् तःगु इलय् जक छम्ह विद्यार्थी बराबर ७ लाख १० हजार तका खर्च जूगु खनेदुगु खः ।
महालेखा परीक्षकया ५८ क्वःगु प्रतिवेदन कथं वंगु २०७६ फागुन ३ गते १८१ म्ह विद्यार्थीतय्त नेपाः हयाः क्वारेन्टाइनय् तःबलय् मुक्कं १३ करोड २८ लाख ४७ हजार तका खर्च जूगु खनेदुगु खः ।
क्वारेन्टाइनय् तःगु इलय् खर्च जूगु धकाः नेपाली सेनां जक नयेत्वनेगु खर्च वापत ५५ लाख व वासः खर्च वापत ६६ लाख ७१ हजार तका काःगु खः । अथेहे उद्धार याःबलय् जूगु हवाइ खर्च व एयरपोर्टं खरिपाटी तक यंकेत यातायात खर्चवापत ४ करोड ४९ लाख ७९ हजार तका खर्च जूगु व मेगु खर्च क्वारेन्टिन निर्माणया निंतिं, इन्टरनेट, क्वारेन्टाइनय् च्वंपिंत ब्रस, स्याम्पु, डायरी, बेड न्यायेत खर्च जूगु खनेदुगु खः ।
LEAVE YOUR COMMENTS