
विश्व नं. १ नोभाक जोकोभिच झ्वःलाक झिक्वःखुसी फ्रेन्च ओपनया क्वार्टरफाइनलय् प्रवेश याःगु दु । सर्बियाया जोकोभिच सोमवाः पेरिसय् जूगु प्रिक्वार्टर फाइनलय् जर्मनीया जान लेनार्डयात बुकूगु खः । जोकोभिचं झ्वःलाक्क झिक्वःतक फ्रेञ्च ओपनया क्वार्टरफाइनलय् थ्यंम्ह न्हापांम्ह कासामि नं जूगु दु ।
जोकोभिचं जर्मन कासामि जान लेनार्डयात ३–० या तप्यंगु सेटय् बुकूगु खः । थ्व झ्वलय् जाकोभिचं १ घण्टा ३३ मिनेट ई दुने ६–३, ६–२ व ६–२ या सेटं कासा थःगु ल्हातय् लाकूगु खः । थुगुसी रोल्यान्ड गारोसय् छगू सेटय् पराजय मफःनिम्ह जोकोभिचं थः तसकं लय्ताःगु खँ धाःगु दु । ‘जि थःगु हरेक कासाय् लय्ताया च्वनागु दु । फुक्कं खँ न्ह्यइपुक बांलाक न्ह्यानाच्वंगु थें जुयाच्वंगु दु ।
थुगुसी क्ले कोर्टय् जिं थःगु दकलय् उत्कृष्ट कासा न्ह्यब्वया च्वनागु थें च्वं’ विजय लिपा जोकोभिचं धाःगु दु । जोकोभिचं क्वार्टरफाइनलय् न्यागुगू वरियताया जर्मन कासामि एलेक्जेन्डर जेभेरे नाप म्हिती । एलेक्जेन्डर गुंगू वरियताया इटलीयन कासामि फाबिओ फोग्निनीयात ३—६, ६—२, व ७—६ (७—५)या सेटं बुकाः क्वार्टरफाइनल प्रवेश याःम्ह खः ।
LEAVE YOUR COMMENTS