फ्रेन्च लिगय् मेसीया न्हापांगु गोल
एजेन्सी÷ अर्जेन्टिनाया स्टार कासामि लियोनल मेसीं पिएसजीइ वयेधुंकाः फ्रेन्च लिग वानय् डेब्यु गोल याःगु दु । पीएसजीया निंतिं च्याम्पियन्स लिगय् गोल यायेधुंकूसां फ्रेन्च लिगय् धाःसा मेसीं गोल यायेमफुनिगु खः । शनिवाः बहनी फ्रेन्च लिगया कासाय् पीएसजीं नान्टेसयात ३–१ गोलं बुकेगु झ्वलय् मेसीं लिगय् न्हापांगु गोल याःगु खः ।
कासाय् पीएसजीया निंतिं न्हापांगु गोल फ्रान्सया स्टार कासामि केलिएन एमबाप्पे याःगु खः । अथे हे नान्टेसया डेनिसं आत्मघाती गोल याःगु खः । नान्टेसया रान्डलं टिमया निंतिं छगू गोल याःगु खः । थ्व कासाय् पीएसजीया गोलकिपर केयलर नाभासं ह्याउँगु कार्ड नःगु खः ।
थुखे इंग्लिस प्रिमियर लिगय् खराब प्रदर्शन यानाच्वंगु म्यानचेस्टर युनाइटेडया मुख्य प्रशिक्षक ओल गन सोल्सार बर्खास्त जूगु दु । झिम्ह कासामिइ सीमित जूगु युनाइटेडयात वाटफोर्डं ४–१ गोल बुकूगु खः । युनाइटेड बुइवं क्लबया आकस्मिक बैठक च्वनाः सोल्सारयात बर्खास्त यायेगु निर्णय याःगु खः । बर्खास्तलिपा क्षतिपूर्तियात कयाः नं खँल्हाबल्हा जूगु दु । सोल्सारया प्रशिक्षणय् युनाइटेडं म्हितूगु लिपागुं न्यागू कासा मध्ये प्यंगुलिइ युनाइटेड बूगु खः । शनिवाः बहनी जूगु लिगया मेगु कासाय् लिभरपुल आर्सनलयात ४–० गोलं व चेल्सी लेस्टर सिटीयात ३–० गोलं बुकूगु दु ।
LEAVE YOUR COMMENTS