पिकें बार्सायात बचे यात
डिफेन्डर जेरार्ड पिकं कासाया ६३ औं मिनेटय् गोल यासें बार्सिलोनायात ला लिगाया म्हिगः जूगु कासाय् पराजय पाखें बचे याःगु दु । झिम्ह सीमित जूगु बार्सिलोनां गिरोन लिसे २–२ गोलया बराबरीइ म्हितुसें ल्याः इनाकायेत ताःलाःगु खः । कप्तान लियोनल मेसीं कासाया १९ औं मिनेटय् याःगु गोलया ग्वाहालिं अग्रता कयाच्वंगु बार्सा ३५ औं मिनेटय् डिफेन्डर लेङ्गलेटयात ह्याउँगु कार्ड नकेवं झीम्ह सीमित जूगु खः ।
गिरोनया पेरे पोन्सयात चुल्यां ख्वालय् लाकेवं लेङलेटयात ह्याउँगु कार्ड नकूगु खः । न्हापांगु हाफया इन्जुरी इलय् उरुग्वेया क्रिस्टिन स्टुआनीं गिरोनया निंतिं गोल यासें कासा बराबरीइ हयाबिलसा लिपांगु हाफ सुरु जूगु ६ मिनेट दुने हे स्टुआनीं मेगु छगू गोल यासें बार्सिलोनायात पराजयया लुखाय् थ्यंकाबीगु खः ।
झिम्हय् सीमित जूसां बांलाःगु कासा न्ह्यब्वःगु बार्साया निंतिं ६३ औं मिनेटय् पिकं हेडपाखें गोल यासें पराजयपाखें बचे यानाबिउगु खः । थ्वयां न्ह्यव नं बार्सां गिरोनया पोस्टय् तःगु आक्रमण याःगु खःसां सफल धाःसा जुइमफुत । स्पेनिस च्याम्पियन बार्सा गोल अन्तरया ल्याखं शीर्षस्थानय् थ्यनाच्वंगु दु । म्हीग जूगु कासाय् स्पानोयलयात बुकावःगु रियल व बार्साया १३–१३ ल्याः दु ।
म्हिगः हे जूगु मेगु कासाय् सेभिल्लां लेभान्टेयात ६–२ गोलं बुकलसा भिल्लारियल व भ्यालेन्सिया दथुया कासा गोलरहित बराबरीइ व रियल बेटिस व एथलेटिको बिलबाओया कासा २–२ गोलया बराबरीइ क्वचाल ।
LEAVE YOUR COMMENTS