ने. सं. ११४४ चौलाथ्व दशमी -

कृत्रिम स्पर्म गनं वइ ?

धाइ । नारीवादीत सकलें उथें जुइमखु । इमित छगः हे दालाय् तयाः स्वये मजिउ । स्वये जी मखु । नारीवाद नं थीथी प्रकारया दु । थीथी विचारधाराया । दक्षिणपन्थी, वामपन्थी, नरमपन्थी, गरमपन्थी, उग्रपन्थी, पृथकतावादी । न्हू न्हूगु विचाः, मूल्य मान्यता ज्वनाः थौंकन्हय् न्हू न्हूगु प्रजातिया महिलावादीत लुयाच्वंगु दु । खनेदइ ।

महिलावाद थौं तरल पदार्थ थें न्हू न्हूगु लँपु ज्वनाः न्ह्याः वनाच्वंगु दु । थन । छम्ह मय्जु लुमंकेबहजू । मय्जुया पूरा नां ल्वःमन । सुवेदी थरया । मय्जु महिलावादी खः । तर साधारण, चानचुनम्ह महिलावादी धाःसा मखु । तसकं हे क्रान्तिकारी, चरपन्थी महिलावादी । टि.भी.इ इलय्व्यलय् खनेदइ । यौन शोषणया विरोधय् गबलें सँ खानाः ।

गबलें अर्धनग्न रुपय् । विरोधया ज्याझ्वः न्ह्याकी । मय्जु महिलावादी जक मखु । उग्र महिलावादी खनेदइ । अझ धाये पृथकतावादी महिलावादी । पुलांम्ह सीके राउत मार्का याम्ह । मय्जु सुवेदीं महिला मुक्तिया धुमधाम वकालत याइ । पुरुष प्रभावं पूर्णतया मुक्त मजूतले महिला मुक्ति असम्भव । मात्र दिवा स्वप्न ।

न्हाय्कं दुनेया चाकुमरि जुइ । उकिं मिसात थःगु मुक्तिया निंतिं मिजंतपाखें पृथक च्वनेमाः । मिसातय्सं थःगु हे स्वतन्त्र संसार थनेमाः । गन व स्वयं थः स्वायत्त जुइ । व मय्जु मिजंप्रति कठोर खनेदइ । मिजंतलिसे जानाः वनेमाः धइगु मध्य मार्ग स्वीकार याइमखु । मिजं निरपेक्ष मिसावादया खँ हइ । मिसातय् पृथकताया परिकल्पना याइ ।

इहिपाया चलनया विरोध याइ । इहिपा स्वयं पुरुष शोषणया ज्याभः खः । थुकिया बहिष्कार यायेमाः । मिजंतय्सं थःगु जालय् मिसातय्त क्यंकेत न्ह्याकूगु खेल खः इहिपा । मिजंतय्सं इहिपापाखें मिसातय्त जालय् क्यंकी । धरापय् लाकी । उकिं मिसात इहिपाया बन्धनय् फसे जुइ मजिउ । इहिपा पंजः खः । अन दुने दुहां वने मजिउ ।

पिहां वये फइमखु । मय्जु सुवेदीं मिजं जाति कं खः । पं खः । थुपिंपाखें तापाक्क च्वनेमाः । होसियार याइ । परम्परां मिसामिजं छगू रथया निचाः घःचाः खः धाइ । थ्व उक्ति गलत खः । मिसातय्त मिजंतय्सं दमन यायेत दयेकातःगु । ह्ययेकेत छुनातःगु खँत्वाः । मय्जु सुवेदीं धाइ, ‘छचाः घःचाः हे यथेष्ट मिसा रथया निंतिं । शंखनाद याइ ।

निचाः घःचाः रथया प्रचलित रुढी मान्यतायात विघटन यानाबी । जिगु मिखाय् छचाः घःचाः जक दुगु साइकल ब्वाकाः गयाच्वंम्ह मनूया दृश्य न्ह्यःने दं वइ । छपा तुतिं धुमधाम प्याखं हुलीम्ह मय्जुया करामत लुमनी । थज्याःगु दृष्टान्तं धाइ ‘पृथकतावादी मिसावाद नं असम्भव मदु ।’ मखु खनिं । जिगु मत्ती लुइ ।

पृथकतावादी मिसावादया आन्दोलन थथे हे च्याना वन धाःसा ! विश्वव्यापी रुप कया वन धाःसा । मानव जाति हे सुका बी ! उजाड, निर्जन, झिझांमिझां दंगु पृथ्वी चाःचाः हुलाच्वंगु खनी । थ्व उग्रपन्थी मिसावादीत मानव विरोधीत खनी ।
शंका लुइ ।

पृथकतावादी मिसावादया आन्दोलन थथे हे च्याना वन धाःसा ! विश्वव्यापी रुप कया वन धाःसा । मानव जाति हे सुका बी ! उजाड, निर्जन, झिझांमिझां दंगु पृथ्वी चाःचाः हुलाच्वंगु खनी । थ्व उग्रपन्थी मिसावादीत मानव विरोधीत खनी । शंका लुइ । मय्जु सुवेदीं पुखुलिइ म्वःल्हुयाः नं म्हय् लखं मथिइकेगु खँ ल्हाना हइ । धाइ ।

‘जि इहिपाया विरोधी मिजं बहिष्कारवादी । तर मातृत्वया पक्षधर । मां जुइगु जिगु नैसर्गिक अधिकार । तीव्र इच्छा । इहिपा मयासे प्रत्येक मिसां थःगु मातृत्वया तृष्णा पूवंके दयेमाः । जि मां जुइ । तर मिजंयात जिं जिगु जीवनया अनिवार्य सहयात्रीकथं स्वीकार याये मखु । मात्र प्रजननया निंतिं जिं मिजंयात बालघरी काये ।

मचा दयेके । अले । थःगु स्वतन्त्र जीवन हने । मय्जु सुवेदीं थःगु मां जुइगु इच्छा पूवंकेगु उपाय कनी । इहिपाया विरोधी मय्जुं मिजंयात कालं कायेगु खँ हइ । मचाबलय् साइकल बालघरी कयाः गयागु लुमना वइ । बालघरीया साइकल । थःगु जुइमखु । मातल्ले गयेगु । ध्यबा पुलेगु । बस् । सिधल । स्थायी स्वामित्वया खँ अन दइमखु ।

मय्जु कोमल वलीं नं इहिपा मजूसां मातृत्व ग्रहण यायेगु संकल्प याःगु खः । प्रणय सुख भोगया लागि मखु । मचा दयेकेत औजारकथं जक बालघरीया मिजं छ्यलाः मां जुइ । पृथकतावादी मिसावादीत । अझ चरमपन्थी, उग्र पृथकतावादी मिसावादीतय्सं मिसावादी वैज्ञानिकतय्त जोडदार इनाप याइ । कृत्रिम शुक्रकिटया याकनं आविष्कार यायेमाल ।

ताकि मिसातय्सं मातृत्व ग्रहण यायेत मिजंतय् भर कायेमाली मखु । अले विना मिजं नं सृष्टि सम्भव जुइ । विश्व हराभरा जुइ । थज्याःगु द्रुत गतिं विज्ञान प्रविधिया विकास जुयाच्वंगु दु । मिजंतय् विकल्पय् कृत्रिम स्पर्म गनं वइ । अले प्रजननया निंतिं मिजं नं बालं काये माली मखु । पृथकतावादी मिसावादीत धुक्क जुइ ।