डबल नेकपाया मुँज्याया सवाल
सरकारया नेतृत्व यानाच्वंगु नेपाल कम्युनिष्ट पार्टी (नेकपा)या केन्द्रीय समितिया थुगुसीया मुँज्या न्हापालिपासिबें ब्यागलंकथं जूगु दु। थुगुसीया मुँज्यापाखें देय् व जनताया निंतिं छु गज्याःगु नीति काल धइगु सवाल सकलसिगु चिउताःया विषय जुइगु स्वाभाविक हे खः । थुगुसीया मुँज्याय् केन्द्रीय दुजःपिंसं दकलय् अप्वः नेतृत्वयात न्ह्यसः तयेगु, आलोचना यायेगुनिसें पार्टी एकता लिपा गुकथं नेता कार्यकर्तातय्गु सःयात न्यनेमाःगु खः उकथं न्यनेगु ज्या मयाःगु, पार्टी व सरकार जनतापाखें तापाना वनाच्वंगु दु धकाः तकं तसकं आलोचना याःगु खनेदत । पार्टी व सरकार जनतापाखें तापाना वनाच्वंगु धाःगुया अर्थ जनताया निंतिं ज्या याये मफयाच्वंगु व जनतात नं सन्तुष्ट मदु धाःगु खः । यदि थ्व हे तालं वन धाःसा कन्हय् वनाः जनतां साथ मबीगु अवस्था वयेफु धइगु खँयात नेतातय्सं गम्भीर रुपं काःगु दु। थुकथं नेतृत्वया आलोचनायात कयाः पार्टीया अध्यक्षद्वयं गुगु लिसः बियादिल उकियात कयाः आः थथेंया निंतिं नेता कार्यकर्तात सन्तुष्ट ला जूगु दु तर कालान्तरय् वनाः पार्टी दुने हाकनं असन्तुष्टि पिहां वइगु संभावना नं उलि हे दु ।
थुगुसीया मुँज्याय् अप्वः हे विवाद जुइफु धकाः तसकं चलाखीपूर्ण धंगं नेतातय्सं एमसीसीया विषययात एजेण्डाया रुपय् महःगु खः । तर उद्घाटन समारोहय् निम्हमध्ये छम्ह अध्यक्ष नापं प्रधानमन्त्री केपी शर्मा ओलीं धाःसा एमसीसी पास जुइ धकाः नवानादीगु खः । अन्ततः केन्द्रीय समितिया मुँज्याय् दकलय् अप्वः बहस नं थ्व हे विषयय् जुल । एमसीसी संसदपाखें अनुमोदन यायेगु-मयोगु धइगु सवालय् पार्टी दुने दकलय् अप्वः सहलहया विषय जुल । अनुमोदन यायेमाः धइगु पक्ष, अनुमोदन याये मजिउ धइगु पक्ष व आः वःगु प्रस्तावया सवालय् हिलाः जक अनुमोदन यायेमाः धइगु पक्ष याना स्वंगू धार खने दत । थुगु कथंया धारयात कया दकलय् अप्वः नेतातय्सं कपाः स्याकेमाल । उकिं अन्तिमय् वनाः वरिष्ठ नेता झलनाथ खनालया नेतृत्वय् स्वम्हेसिया कार्यदल तकं दयेकेगु ज्या जुल । खनाल स्वयं एमसीसीया विपक्षय् दनादीम्ह खःसा मेम्ह सदस्य भिम रावल नं उकिया विपक्ष दुम्ह खः । मेम्ह दुजः प्रदिप ज्ञवाली धाःसा पक्षय् दुम्ह खः । थ्व ल्याखं स्वल धाःसा प्रधानमन्त्री नापं पार्टीया अध्यक्ष केपी शर्मा ओलीं धयादी थें गथे खः अथे हे पारित यायेगु निंतिं कार्यदलपाखें गृहकार्य यानाः हइगु अवस्था खनेमदु। झिन्हुया दुने प्रतिवेदन पेश याइगु अवस्थाय् अध्यक्ष केपी शर्मा ओलीया भावनाया अःखः न्ह्याः वनीगु नं उलि हे सम्भावना दु ।
अथे हे पार्टी दुने नेतात भ्रष्टाचारय् संलग्न जूगु, विकृति अप्वया वःगु धकाः नं कडा रुपय् केन्द्रीय दुजःपिं प्रस्तुत जुयादीगु दु। उकिं यानाः पार्टी दुने अप्रत्यक्ष रुपय् नेता कार्यकर्तात भ्रष्टाचारय् संलग्न जूगुयात स्वीकार यायेत बाध्य जूगु दु। उकिं च्वंनिसें क्वय्या तहया नेता कार्यकर्तातय्गु तकं सम्पत्ति छानविन यायेगु धकाः धायेत बाध्य जुल । उकिया निंतिं पार्टीया अनुशासन आयोगयात भाला बिउगु दुसां उकियात आतक नं पूर्णता बियाच्वंगु अवस्था मदुनि । थ्व ल्याखं स्वयेगु खःसा पार्टीया नेता कार्यकर्तातय्गु सम्पत्ति गुकथंया छानविन जुइ व उकिं याना पार्टी दुने तःधंगु लिच्वः लायेफुगु सम्भावना नं उलि हे दु ।
एमसीसी संसदपाखें अनुमोदन यायेगु÷मयोगु धइगु सवालय् पार्टी दुने दकलय् अप्वः सहलहया विषय जुल । अनुमोदन यायेमाः धइगु पक्ष, अनुमोदन याये मजिउ धइगु पक्ष व आः वःगु प्रस्तावया सवालय् हिलाः जक अनुमोदन यायेमाः धइगु पक्ष याना स्वंगू धार खने दत ।
थुगुसीया मुँज्यां याःगु छता बांलाःगु ज्या धइगु भारतं नेपाःया सीमा अतिक्रमण याना गुगु राजनीतिक नक्सा पिकाल व नक्सायात अस्वीकार यायेगु धकाः निर्णय याःगुयात सकसिनं बांलाःगु मिखां स्वःगु दु। सीमाया सवालय् ओली सरकारं ल्ह्वंगु मुद्दायात समर्थन यायेगु धकाः धाःगु बांलाःगु पक्ष जुया बिउगु दु। पार्टी केन्द्रीय समितिया बैठकय् कम्युनिष्ट पार्टीया ल्याखं माक्र्स व एंगेल्सया किपा तयेमाःगु थासय् निम्ह अध्यक्ष ओली व दाहालया किपा तःगुलिइ नं केन्द्रीय नेतातय्सं तसकं आलोचना याःगु दु। थुगु आलोचनायात स्वीकार यानाः कन्हय्या दिनय् अज्याःगु गल्ती यायेमखु धकाः तकं धायेत बाध्य जूगु दु ।
नेपाल कम्युष्टि पार्टी (नेकपा)पाखें केन्द्रीय समितिया मुँज्या लिपा आः राष्ट्रिय अभियान संचालन यायेगु धकाः धाःगु खँ तसकं अर्थपूर्ण खः । राष्ट्रिय अभियान संचालन यायेगु धाःगु केन्द्रीय मुँज्याय् वःगु खँयात संबोधन यायेत, कार्यकर्तातय्त सन्तुष्ट यायेत, जनतालिसे नापं च्वनेत अले पार्टी दुने क्वय्या तहय् ब्वलनाच्वंगु समस्यायात समाधान यायेत खः धकाः स्पष्ट रुपं धायेफइगु अवस्था दु ।
पार्टीं न्ह्याकीगु अभियान स्वलाया जुइगु, फागुन १ गतेनिसें बैशाख मसान्त तक न्ह्याइगु, पार्टीया सदस्यता वितरण, नवीकरणया ज्यायात तीव्रता बीगु, नेता कार्यकर्तातय्त पार्टी कमिटी वा सम्बद्ध संगठनय् संगठित यायेत, विकास निर्माण व समृद्धिनाप स्वानाः पार्टी परिचलान यायेत नापं जन निर्वाचित संस्थातय्त नं सहीकथं परिचालन यायेगु
धाःगु दु। थुकिया अर्थ आःया अवस्थाय् स्थानीय सरकारं जनताया ज्या गुकथं यायेमाःगु खः उकथं यानाच्वंगु मदु, जनतालिसे नेता कार्यकर्तात नापं मदु, जनता छखे नेता कार्यकर्तात मेखे जुयाच्वन धकाः नेतातय्सं थुइकूगु दु। उकिं हे न्हूगु कथंया थ्व अभियान संचालन यायेत्यंगु खः धकाः धायेफइगु अवस्था दु ।
पार्टीया कार्यकर्तात भ्रष्टाचार, अनियमितता, चुहावट, सामाजिक विकृति विरुद्ध परिचालन यायेगु अले जनताया सेवक धाइपिं हे डबल नेकपाया कार्यकर्तात खः धकाः महसूस याके बीगु धकाः गुगु आज्जु तल दकलय् न्हापां पार्टीया नेता कार्यकर्तात भ्रष्टाचारय् संलग्न जुयाच्वंगु आशंका यानाः सम्पत्ति छानविन यायेगु धाःगुलिं नं गुलिं नेतातय्सं जनतानाप च्वनाः कार्यकर्तातय्सं ज्या याइ अले जनताया नुगः त्याकी धकाः तायेकूगु खः व उलि जुइगु अवस्था धाःसा खने मदु धाःसां छुं पाइमखु ।
डबल नेकपाया थुगुसीया केन्द्रीय समितिया मुँज्याय् गुकथं केन्द्रीय नेतातय्सं न्ह्यसः तल अले उकियात अध्यक्षद्वयं लिसः बिल व धइगु आः थथेंया निंतिं बांलाःगु लिसः जूसां कन्हय्या दिनय् धाःसा उकिं बांमलाःगु लिच्वः नं वयेफुगु संकेत खनेदु ।
LEAVE YOUR COMMENTS