ने. सं. ११४४ कछलागा षष्ठी -

नेपालय् अमेरिकी दबाब चीनयात अमान्य

येँ – एमसीसी पारित यायेगु वा मयायेगु धकाः नेपाःया राजनीतिइ पिहां वःगु विवादया दथुइ थ्व सम्झौतालिसे स्वापू दुगु चीन व अमेरिका दथुइ नं वाक्युद्ध शुरु जूगु दु । म्हिगः चीनया बेइजिङय् चिनियाँ परराष्ट्र मन्त्रालयं याःगु पत्रकार सम्मेलनय् न्ववासें परराष्ट्र प्रवक्ता वाङ वन पिनं नेपालय् फेब्रुअरी २८ तारिख तकया दुने एमसीसी पारित यायेमाः धकाः अमेरिकां ‘धम्की कुटनीति’ शुरु याना हल धकाः द्वपं बियादीगु दु ।

प्रवक्ता वन पिनं नेपाःलिसे सहकार्य यायेगु नामय् अमेरिकां धम्की कुटनीति शुरु याना हःगु धासें उकियात चीनं प्रतिरोध यायेगु खँ समेत धयादीगु दु । उगु पत्रकार सम्मेलनय् छम्ह पत्रकारं नेपाःयात अमेरिकां एमसीसीबारे दबाब बियाच्वंगु बारे चीनया धापू छु दु धकाः न्यंगु न्ह्यसःया लिसः बिसें प्रवक्ता वन पिनं थ्व खँ धयादीगु खः ।

विकासया सवालय् थःत यःगु लँपु लीत नेपाः स्वतन्त्र खः धासें उकिया लागिं गज्याःम्ह साझेदारी ल्ययेगु धकाः निर्णय यायेगु अधिकार नं नेपाःयात दुगु खँ वन पिनं कनादीगु दु ।

बेइजिङय् चीनया थज्याःगु धापू वयाच्वंगु हे इलय् थुखे येँय् धाःसा नेपाःस्थित अमेरिकी राजदुतावासपाखें छगू ट्विट यासें छुं नं विषययात कयाः विरोध यायेगु अधिकार सकसिकें दु तर उकिया लँपु हिंसात्मक जुइ मजिउ धाःगु दु । यदि हिंसात्मक कथं विरोधया ज्याखँ जुल धाःसा उकियात थःपिंसं स्वीकार मयायेगु ख्याच्वः नं ट्विटय् धयातःगु दु । थ्व स्वयां न्ह्यः अमेरिकाया छम्ह सहायक विदेशमन्त्रीं नेपाःया फुक्कं नेतातय्त फोन यानाः यदि फेब्रुअरी २८ तक नं एमसीसी पारित मयात धाःसा नेपाःलिसेया स्वापू बारे हे बिचाः याये मालीगु ख्याच्वः बिउगु खः ।

आः विदेशीया रणभूमि जकं जुइगु खःला !
नेपालं एमसीसी पारित मयाःगु खँयात कयाः चीन व अमेरिकाया दथुइ वाक्युद्ध शुरु जूगुलिं आः नेपाः चीन व अमेरिका थेंज्याःगु विश्व शक्तितय् शक्ति प्रदर्शन यायेगु रणभूमि जकं जुइगु खः लाकि धइगु चिउताः नं ब्वलंगु दु ।

नेपालं चीन तंचाइ धकाः हे एमसीसी पास मयाःगु खः धकाः अमेरिकां द्वपं बियाच्वंगु हे इलय् चीनं उकियात लिसः बी कथं थज्याःगु धापू तया हःगु खः । एमसीसी मुक्कं नेपाः व अमेरिका दथुइ जुइत्यंगु सम्झौता खःसां उकी चीनं वयाः न्ववाःगुलिं आः नेपाःया आन्तरिक मामिलाय् शक्ति राष्ट्रतय्सं हस्तक्षेप याना हःगु महसुस यानाहःगु दु । आः चीन व अमेरिकाया धापूयात कयाः हानं मेगु छुं देशं टिप्पणी याना हल धाःसा थुकिं नेपाःयात मछिंगु अवस्था ब्वलंका बीगु आशंका याना हःगु दु ।

नेपाःया खँयात कयाः चीन व अमेरिका दथुइ शुरु जूगु थ्व वाक्युद्धं आः तःधंगु रुप काये न्ह्यः हे थुकियात समाधान याना छ्वयेमाःगु बिचाः परराष्ट्रविद्तय्सं प्वंका हःगु दु । चीन व अमेरिकाया थ्व टिकाटिप्पणी लिपा एमसीसी पास जुइ वा फेल जुइ धइगु खँ आः थ्व निगुलिं देय्या लागिं आधिकारिक रुपं हे अहम्या मुद्दा जू वनेधुंकूगु खनेदु धकाः नं विज्ञतय्सं धयाहःगु दु ।