नेयमारयात बलात्कारया आरोप

ब्राजिलया स्टार कासामि नेयमारयात ब्राजिलया हे साओ पाओलाय् च्वंम्ह छम्ह मिसां बालात्कार याःगु द्वपं बिउगु दु । नां सार्वजनिक मयाःनिम्ह उम्ह मिसां नेयमारं फ्रान्सया छगू होटेलय् सःताः थःत बलात्कार याःगु द्वपं बिउगु खः । साओ पाओला पुलिसय् दर्ता जूगु अभियोगपत्रय् नेयमारं ब्राजिलं फ्रान्स वयेगु हवाइ टिकट व पेरिसय् होटल बुक याना बिउगु धयातःगु दु ।

उम्ह मिसाया कथं मे १५ तारिखय् थ्व घटना जूगु खः । वं इन्स्टाग्राम मार्फत नेयमारलिसे म्हसिका जूगु खँ नं धाःगु दु । नेयामार यला त्वना पीडित धयातःम्ह मिसां घटना फ्रान्सय् जूगु खःसां निन्हु लिपा ब्राजिलय् वनाः पुलिसय् उजुरी बिउगु खः ।नेयामारं थ्व द्वपंयात अस्वीकार याःगु दु ।

नेयमारया अधिकारिक वेबसाइटय् छगू व्यक्तव्य जारी यासें थ्व समाचारं नेयमार अजू चाःगु थज्याःगु घटना जूगु बारे जानकारी मदुगु खँ धयातःगु दु । वक्तव्यय् धयातःगु दु– छुं न्हि न्ह्यवनिसें नेयमारयात साओ पाओलाया वकिलतय्सं ध्यबा माग यानाः धम्की बियाच्वंगु व व हे वकिलतय्सं मिसा न्ह्यःने तयाः ब्लाय्कमेल याःगु खः ।

नेयमारं बलात्कार मयाःगु व नेयमारयात धम्की वःगु प्रमाण पुलिसयात बीगु खँ नं वक्तव्यय् धयातःगु दु । नेयमारया अबुं नं थ्व षडयन्त्र खः धाःगु दु ।