नेवाःतय् निगू संस्कृति अभौतिक सम्पदा धलखय्

येँ (नेपालभाषा टाइम्स) – नेपाःया राष्ट्रिय अभौतिक सम्पदाया धलखय् नेवाः समुदायया मेगु निगू सम्पदा नं दुथ्याःगु दु । मध्यपुर थिमि बोडेया म्ये प्वाःखनीगु जात्रा व निलबाराही प्याखंयात अभौतिक सम्पदाया धलखय् दुथ्याकूगु खः ।

संस्कृति पर्यटन तथा नागरिक उड्डयन मन्त्रालयपाखें थुगुसीया निंतिं खुगू सांस्कृतिक सम्पदायात अभौतिक सांस्कृतिक सम्पदाया धलः तयार याःगु खः । उकी नेवाःतय्‌गु निगू, मगःतय् निगू व माझी आदिवासीतय्‌या छगू दुथ्याःगु दु । थगुने नेवाःतय् यःमरि पुन्हि व यःमरि यात अभौतिक सांस्कृतिक सम्पदाया धलखय् दुथ्याकूगु खः । थुकिया लिसें नेवाःतय्‌गु स्वंगू संस्कृति राष्ट्रिय अभौतिक सम्पदाया धलखय् दुथ्याःगु दु ।

म्ये प्वाःखनीगु जात्राया निंतिं सजीव श्रेष्ठं निवेदन बिउगु खः ।अभौतिक सम्पदाया विधा कथं समाजिक व्यवहार, अनुष्ठान जात्रा धकाः दुथ्याकातःगु दुसा अभ्यास याइपिं समुदाय कथं नेवाः समुदाय दुनेया श्रेष्ठ, ज्यापु, नकर्मी समुदाय धकाः न्ह्यथनातःगु दु । थाय्‌बाय्‌ कथं बागमति प्रदेशया ख्वप जिल्ला मध्यपुर थिमि नगरपालिका कथं दुथ्याकातःगु दु ।

उकथं हे निलबराही गण प्याखंयात कयाः विनोद खमुं निवेदन बिउगु खः । थुकिया विधा अभिनय मञ्चन कला धकाः न्ह्यथनातःगु दुसा अभ्यास याइपिं नेवाः समुदायया श्रेष्ठ, ज्यापु, नकर्मी समुदाय धकाः न्ह्यथनातःगु दु । थाय्‌बाय्‌ कथं बागमति प्रदेशया ख्वप जिल्ला मध्यपुर थिमि नगर पालिका ८ बोडे धकाः दुथ्याकातःगु दु । अभौतिक सम्पदाया धलखय् माझी समुदायया लदी पुजा, मगर समुदाय भूमे पुजा व मगर नचारु स्याँई नाचयात दुथ्याकूगु दु ।