नेवाः पुचलं दुबई भलिबल धेंधेंबल्लाः याइगु

येँ – नेवाः पुचः युएईपाखें दुबइलय् भलिबल धेंधेंबल्लाः याइगु जूगु दु । नेवाः पुचलं वंगु जुलाई २७ य् दुबईया एभरेस्ट मार्सल आर्ट हलय् छगू पत्रकार सम्मेलन यासें ऐतिहासिक रुपं भलिबल धेंधेंबल्लाः यायेत्यनागु जानकारी बिउगु खः ।

पत्रकार सम्मेलनय् न्ववासें पुचःया खेलकूद संयोजक हिरालाल श्रेष्ठं युएइइ च्वंपिं नेपाली दथुइ स्वापू क्वातुका यंकेत भलिबलया अन्तर्राष्ट्रिय, राष्ट्रिय स्तरया कासामि, न्हूपिं कासामित छथाय् तयाः भलिबलया अनुभव कालबिल यायेत, स्तर उन्नतिया निंतिं ह्वःताः बीत ज्याझ्वः यायेत्यनागु जानकारी बियादिल ।
भलिबल धेंधेंबल्लाः वइगु अगस्ट २३ य् मुस्मांतय् महान नखः वकर इदया बिदाया न्हि कुन्हु याइगु जूगु दु ।

भलिबल धेंधेंबल्लाःया निंतिं जुबेल अलिया लेवर क्याम्पया नुजल भलिबल कोर्टय् अन्तर्राष्ट्रिय स्तरया रबर फ्लोर दुगु कोर्टया व्यवस्था यानागु जानकारी नं बिउगु खः । धेंधेंबल्लाखय् अप्वलय् झिंच्यागू टिमं ब्वति काइगु व हरेक टिमय् गुम्ह कासामि व छम्ह म्यानेजर दइगु जानकारी नं बिउगु खः ।

थुगु धेंधेंबल्लाः युएईया नेपालीतय् इतिहासय् हे दकलय् अप्वः दां सिरपाः दुगु धेंधेंबल्लाः जुइगु खँ नं धाःगु दु । न्हाप व लिउ लाःगु टिमयात नगद लिसें ट्रफी व मेडल सिरपा बीगु व सर्वोत्कृष्ट कासामियात दसिपौ लःल्हाइ । कासा अन्तर्राष्ट्रिय नियम कथं हे संचालन जुइगु जानकारी नं बिउगु खः । थुगु धेंधेंबल्लाःया न्हाप लाःगु टिमया सिरपाः नेपाली चुलों प्रायोजन याइ । थुकिया लिसें थीथी व्यवसायी, व्यक्तिपिंसं प्रायोजन ग्वाहालि याःगु खँ धाःगु दु ।

नेपाल पत्रकार महासंघ युएई शाखां मिडिया कोअर्डिनेट यानाच्वंगु धेंधेंबल्लाःया निंतिं नेपालभाषा टाइम्स अनलाइ लिसें नेपाल खेल, मोफसल अनलाइन टिभी, मानक मिडिया, नेपाल खबर, डिसी नेपाल मिडिया पार्टनर जुयाच्वंगु दु ।
पत्रकार सम्मेलनय् नेवाः पुचः युइएया उपाध्यक्ष राजेश प्रधान, धेंधेंबल्लाःया उपसंयोजक व पुचःया दुजः रवि शाही व मनोज प्रसाद श्रेष्ठपिं उपस्थित जुयादीगु खः ।