ने. सं. ११४४ कौलाथ्व एकादशी - चालं

कोलारोभया आकर्षक गोलं सर्विया त्यात

एजेन्सी- अलेक्जेन्डर कोलारोभया आकर्षण फ्रिकिकया ग्वाहालिं सर्विया थुगु विश्वकपया थःगु न्हापांगु कासा त्याकेत ताःलाःगु दु । कोस्टारिका विरुद्ध जूगु कासाय् सर्विया १–० गोलं त्याकूगु खः ।

म्यानचेस्टर सिटीया पुलांम्ह डिफेन्डर व सर्वियाया कप्तान कोलारोभं २५ यार्ड तापाकं थ्वाःगु फ्रिकिक बल कोस्टारिकाया वाल पार यानाः चाःहिलाः पोस्टय् दुहां वंगु खः ।

समूह ‘ई’या ब्राजिल व स्विट्जरल्यान्ड लिसें लाःगु थ्व निगुलिं टिमया निंतिं थौंया कासा महत्वपूर्ण जुयाच्वंगु खः । गुकी सर्वियां न्हापांगु कासाय् ३ अंक कायेत ताःलाःगु दु ।