येँ महानगरपालिकां ‘त्वाः त्वालय् संकिपा महोत्सव’ संचालन याइगु
येँ (नेपालभाषा टाइम्स) – येँ महानगरपालिकां संकिपाया पेशाकर्मिपिंत समुदायलिसे स्वायेगु ल्याखं ‘त्वाः त्वालय् संकिपा महोत्सव’ संचालन याइगु जूगु दु । येँ महानगरं संकिपाया पेशाकर्मीयात समुदायलिसे स्वाये गु नापं समुदायपाखें सम्मान याये गु ज्याझ्वःकथं ‘त्वाः त्वालय् संकिपा महोत्सव’ संचालन यायेत्यंगु खः ।
येँ महानगरपालिका ८ वडा अध्यक्षलिसें सम्पदा तथा पर्यटन समितिया संयोजक आशामान संगतं ‘त्वाः त्वालय् संकिपा महोत्सव’ ज्याझ्वलं संकिपा ख्यःया दक्वं विधायात समुदायलिसे स्वाइ धयादिल । संकिपा मूल्यांकन समितिया संयोजक तकं जुयादीम्ह संगतं संकिपायात मनोरञ्जनया रुपय् जक काये मजिउ धासें थ्व मनोरञ्जनया माध्यम ला खः हे खत थ्व बाहेकं शिक्षा, सूचना, सन्देश व जानकारीया संवाहक व रचनात्मक उद्योगया विकास यायेगु ख्यःया रुपय् नं म्हसीकायंके माःगु ई वःगु वय्कलं धयादीगु दु ।
समुदायस्तरय् संकिपा महोत्सव ज्याझ्वः संचालन, व्यवस्थापन यायेत येँ महानगरपालिकां सामाजिक व सांस्कृतिक गतिविधि, क्रियाकलापय् आवद्ध गैर नाफामूलक संघसंस्था, युथ क्लब, सामुदायिक संस्था, टोल विकास समिति, सांस्कृतिक पुचः, समूहयात जिम्मेवारी बीगु नं निर्णय याःगु दु ।
महोत्सवय् परम्परागत त्वाः, बहाः, बही, चुक, ननि, एम्पी थिएटर, पार्क थेंज्याःगु खुल्ला संकिपा क्यनीगु जुइ । समुदायस्तरया ज्याझ्वः
जूगुलिं व्यवस्थापनय् सहकार्य याये मंदुपिं इच्छुक संघसंस् थायात प्रस्ताव आह्वान यानागु सम्पदा विभागया प्रमुख कुमारि राईं कनादीगु दु ।
प्रक्रियापाखें छनोट जूगु संघसंस्थायात सहभागितामूलक संकिपा ‘त्वाः त्वालय् संकिपा महोत्सव’ ग्वसाः ग्वयेत ज्याझ्वः संचालन यायेत ग्वाहालि, क्युररेटेड संकिपा व संकिपा क्यने गु निंतिं एलइडी, साउण्ड सिस्टम सहितया प्राविधिक ग्वाहालि महानगर पालिकां उपलब्ध याइ ।
कान्स फिल्म फेस्टिभलं लिहां वयेधुंकाः कार्यवाहक प्रमुख सुनिता डंगोलं थ्व ज्या न्ह्याकेत्यनागु जानकारी बियादीगु खः ।
LEAVE YOUR COMMENTS