रामशेखर लुमंकाः साहित्य गोष्ठी

ख्वप – रामशेखर लुमन्ति दबूया ग्वसालय् रामशेखर बुदिं हने कथं सनिवाः ख्वपया भौल्वाछेँ च्वंगु महाकाली द्यःछेँय् साहित्य गोष्ठी जुल । गोष्ठीइ रामशेखरलिसे सतीम्ह कलाकार आशाकाजी थकुं वय्कःनाप च्वनाबलयया थीथी न्ह्यइपुगु प्रशंग न्ह्यब्वयादिल ।

उगु साहित्यिक ज्याझ्वलय् प्रदीप शाक्य, ओमकृष्ण श्रेष्ठ, तेजकृष्ण श्रेष्ठ, बसन्त नकःमि, नविनप्रकाश श्रेष्ठ, न्हुछेभक्त कवां, रामेश्वर भुजू, तीर्थभक्त थकु, दिब्या ताम्राकार, त्रिरत्न शाक्य, केवलप्रसाद कायस्थ, महेन्द्रगोपाल कर्माचार्य, वंशीधर बज्राचार्य, सुनिल बज्राचार्य, नरेश अमात्य, सुलोचना सैजू जोशी, सौरभ शाक्य व श्याम आशापिसं थःथःगु रचना पाठ यानादीगु खः ।

पाठ जूगु रचनायात कयाः साहित्यकार धु्रव मधिकर्मिं समीक्षा यानादीगु खः । वय्कलं बाखंया विषय घनिभूत जुइमाः धयादिसें खँ ल्हाये थें जक च्वयां कविता जुइ मखु, छगू चरण पार यायेधुंकूपिं कवि साहित्यकारं च्वयेगु इलय् झन अप्वः बिचाः यानाः जक च्वसा न्ह्याकेमाः धयादिल ।

रामशेखर लुमन्ति दबूया नायः प्रा. गोविन्दमान श्रेष्ठया सभापतित्वय् जूगु उगु ज्याझ्वलय् संस्थाया कोषाध्यक्ष डा. प्रकाश सुवालं सुभाय् देछानादिल ।