विराट गुथिया संस्थापक रत्नगोपाल सैंज मन्त

विराट नेपालभाषा साहित्य सम्मेलन गुथि ख्वपया संस्थापक दुजः व थौंकन्हय्या सल्लाहकार रत्नगोपाल सैंजु मंगलवाः सनिलय् ८७ दँया वैशय् मन्त । सिनामंगलय् च्वंगु केएमसी अस्पतालय् आइसीयुलय् तयाः उपचार यानाच्वंगु इलय् वय्कः मदुगु खः । वय्कःया अन्त्येष्टी पशुपति आर्यघाटय् जुइधुंकूगु दु ।

सामाजिक ज्याया न्ह्यलुवाः सैंजु ख्वपय् नेपालभाषा, साहित्य र राजनीतिक जागरणया नं न्ह्यलुवाः खः । वय्कलं पंचायती व्यवस्थाया न्हापांगु चुनावय् ख्वप नगरपालिका वडा नं. १४ य् वडाध्यक्षया रुपय् निर्वाचित जुयाः जनता सेवा यानादीगु खः । पंचायती व्यवस्थां नेपाली जनताया भाषिक स्वतन्त्रताया अधिकार हनन यानाबीवं तानाशाही व्यवस्था विरुद्ध सः तच्वयेकेत नेपालभाषा साहित्य सम्मेलन गुथि नीस्वनादीगु खँ विराट गुथिका सचिव बाबुकाजी श्रेष्ठं कनादिल ।

मचांनिसें सामाजिक ज्याय् सक्रिय सैंजु ख्वपया थीथी संघसंस्थाय् नं आवद्ध जुयाच्वनादीम्ह खः । नेपालभाषा साहित्य मन्दिरया दुजः व बाराही मन्दिर विकास समितिया पुलांम्ह अध्यक्ष नं जुयादीम्ह वय्कलं नेपालभाषा, साहित्य, कला व संस्कृति संरक्षणया निंतिं तःधंगु योगदान यानादीगु दु । वय्कलं भाषिक व साहित्यिक आन्दोलनय् नं आन्दोलनका सशक्त नेतृत्वकारी भूमिका म्हितादीगु दु ।

ख्वपया नासमना त्वालय् वि.सं. १९९८ सालय् बूम्ह वय्कःया निम्ह काय, न्याम्ह म्ह्याय् दी । वय्कःया जहान धाःसा मदयेधुंकूगु दु ।
विराट गुथिका अध्यक्ष कृष्णभक्त बोडें वय्कः मदुगुलिं विराट गुथियात तःधंगु क्षति जूगु धासें सशक्त अभिभावक तंकेमाःगु खँ धयादीगु दु ।