ने. सं. ११४६ बछलागा चौथी -

आः अंग्रेजी भासं बुंगद्यःया बाखं

येँ – झीसं न्हापांनिसें न्यना वयाच्वनागु बुंगद्यःया बाखं आः अंग्रेजी भासं पिहां वःगु दु । ‘द स्टोरी अफ अवलोकितेश्वर करुणामय’ नां तयाः पिहां वःगु उगु बाखं अर्थरत्न तुलाधरं च्वयादीगु खः । थ्व बाखं वय्कलं छुं सफूया तप्यंक अनुवाद यानादीगु मखुसां थीथी स्रोतं काःगु बाखंयात पुनः लेखन यानादीगु खः ।

थीथी किपा व स्केच समेत दुगु थुगु सफू अंग्रेजी भाषाया ब्वँमिपिंसं ययेकीगु आशा याःगु दु ।हितकरया सफू अंग्रेजी भासं थ्वहे झ्वलय् नांजाःम्ह बाखं च्वमि हितकरवीर सिंह कंसकारया नांजाःगु बाखं सफू ‘मिजला’ नं आः अंग्रजीं भासं अनुवाद जुयाः पिहां वइगु जूगु दु । डा. तेजरत्न कंसकारं अनुवाद यानादीगु उगु सफू अमेरिकाया नेवाः अमेरिकन दबूपाखें पिथनेत्यंगु खः । याकनं हे अमेरिकाय् थुकिया विमोचन जुइत्यंगु दु ।