यल महानगरया १०४ क्वःगु स्थापना दिवस
यल (नेपालभाषा टाइम्स)- यल महानगरपालिकां थःगु १०४ क्वःगु स्थापना दिवस हंगु दु । यल महानगरं वंगु शनिवाः छगू विशेष ज्याझ्वः यासें स्थापना दिवस हंगु खः । प्रधानमन्त्री शेरबहादुर देउवाया प्रमुख आतिथ्यताय् जूगु ज्याझ्वलय् महानगरं न्हापांखुसी कला, साहित्य व संस्कृतिया ख्यलय् विशिष्ट योगदान बियादीपिंत छगू लख तका दांया ‘ललितपुर महानगर गौरव पुरस्कार’ नं लःल्हाःगु खः ।
ज्याझ्वलय् प्रम देउवां वरिष्ठ मूर्तिकार क्रोधकला शिरोमणि प्राज्ञ कालु कुमाले, वरिष्ठ धातु मूर्तिकार मदुम्ह राजकुमार शाक्य, यल महानगरया पुलांम्ह प्रमुखलिसें पूर्वमन्त्री बुद्धिराज वज्राचार्य व वरिष्ठ साहित्यकार व अन्वेषक छत्रबहादुर कायस्थयात उगु पुरस्कार लःल्हाःगु खः । अथे हे संस्थागत व व्यक्तिगत रुपं अप्वः कर पूपिंत नं सम्मान याःगु खः ।
ज्याझ्वलय् नवासें प्रम देउवां स्थानीय तहया काम कारवाही जनमुखी, पारदर्शी व नागरिकप्रति उत्तरदायी जुइमाः धासें नागरिकलिसे दकलय् सतीगु सरकार जूगुलिं नं स्थानीय तहया काम कारवाही नागरिकप्रति जवाफदेही जुइमाः धयादिल ।
यल महानगर प्रमुख चिरिबाबु महर्जनं महानगरया कला, संस्कृति व साहित्यया ख्यलय् ज्वःमदुगु योगदन बियादीपिं व्यक्तियात म्हतिं छगू लख तका दांलिसें ‘ललितपुर महानगर गौरव पुरस्कार’पाखें सम्मानित यानागु जानकारी बियादिल ।
लिसें वय्कलं स्वनिगलय् आः हाकनं मोटरसाइकल दुत हयाः ट्राफिक जाम अप्वयेकेगु पलेसा मेट्रो रेल संचालन यायेगु तयारी न्ह्याकेमाः धयादिल । स्वनिगलय् आः मेट्रो रेलया विकल्प मदु धासें मेट्रो रेल तसकं थिके धकाः लिचिले मजिउ, संघीय सरकारया ख्वाः स्वयाच्वनेगु मखु झीपिं थः हे न्ह्यचिलेमाःगु वय्कःया धापू दु ।
अन्तर्राष्ट्रिय अध्ययनकथं नं ३० गू लख स्वयां अप्वः जनसंख्या दुगु थासय् मेट्रो रेल अपरिहार्य जूगु खँय् बः बियादिसें थुकिया संचालनया निंतिं येँ महानगरपालिकां हे विशेष भूमिका म्हितेमाःगु नं वय्कलं धयादीगु दु । यल जिल्लापाखें नवनिर्वाचित प्रतिनिधिसभा सदस्य, प्रदेशसभा सदस्य, येँ महानगरपालिका प्रमुख बालेन्द्र शाह, उपप्रमुख सुनिता डंगोल, यल महानगरलिसे भगिनी सम्बन्ध दुगु द्वाल्खाया भिमेश्वर नगरपालिकाया प्रमुखया विशेष उपस्थिति दुगु खः ।
येँ शाह, यल क्षेत्र नं ३ या प्रतिनिधिसभा सदस्य डा. तोसिमा कार्की लगायतं नुगःखँ प्वंकादीगु ज्याझ्वलय् उपप्रमुख मञ्जली शाक्यं लसकुस यानादीगु खः ।
LEAVE YOUR COMMENTS