यलय् आपतकालीन अवस्थाया निंतिं रिजर्भ ट्यांकी

यल – यल महानगरपालिकां आपतकालिन अवस्थाय् वइगु समस्या ज्यंकेत रिजर्भ ट्यांकी निर्माण याइगु जूगु दु । यल मनपां मिं नइगु थेंज्याःगु आपतकालीन अवस्थायात ध्यानय् तयाः रिजर्भ ट्यांकी निर्माण यायेत्यंगु खः । यल मनपा वडा नं. १२ या मंगलबजाः स्थित पर्यटकीय शौचालय लिक्कं लाःगु थासय् ट्यांकी निर्माण यायेत्यंगु खः ।

यल मनपां यलया समस्यायात ध्यानय् तयाः उकथं ट्यांकी निर्माण यायेत्यंगु खःसां नं उगु ट्यांकीया लः आपतकालीन अवस्थाय् स्वनिगः न्यंकंया जनता उपभोग याये खनीगु धाःगु दु । ट्यांकी निर्माणया निंतिं यल मनपां विपद् व्यवस्थापन कोषय् छुटे यानातःगु १० गू करोडमध्ये करिब ७५ लाखया छगू चिधंगु योजनाकथं थुकियात न्ह्यःने हयागु यल मनपा वडा नं. १२ या वडाअध्यक्ष नारायणलाल अवालें कनादिल ।

करिब २५ हजार लिटर लः न्ह्यनीगु क्षमताया ट्यांकी निर्माणया निंतिं ढाँचा तयार जुइ धुंकूगु धासें वइगु बाःछिय दुने निर्माण प्रक्रिया न्ह्याकेगु नं वय्कलं धयादिल । स्वनिगलय् मिं नइगु घटना जुल धाःसा तत्काल लःया आवश्यकता पूर्ति यायेत अःपुइमा धइगु ल्याखं थुगु योजना न्ह्यःने हयागु व थुकियात याकनं प्रक्रियाय् न्ह्याकेगु धाःगु दु ।

थ्व हे झ्वलय् यल मनपां स्वंगू लाख तका खर्च यानाः प्रत्येक वडाय् सतक मत जडान याइगु जूगु दु । अथे हे लँय् वये वने याये अःपुकेया निंतिं ल्वहं छापे यायेगु योजना नं न्ह्याकीगु जूगु दु ।