पहिचानवादी आन्दोलनयात वकिल व बुद्धिजीवीया समर्थन
येँ (नेपालभाषा टाइम्स)÷प्रदेश नं. १ यात ‘कोशी प्रदेश’ नां तःगु विरुद्ध पूर्वी नेपाःया थीथी जिल्लाय् न्ह्यानाच्वंगु आन्दोलन आः झन् तच्वः जुया वंगु दु । उगु लागाया पहिचानवादी संघ संस्थातय्सं न्ह्याकाच्वंगु थ्व आन्दोलनयात आः थीथी राजनीतिक दलतय्सं नं समर्थन याना हयेवं थुकिं आः मेगु मोड काइगु संकेत खने दया वःगु दु ।
‘कोशी’ नामाकरण विरुद्ध न्ह्यानाच्वंगु आन्दोलनया झ्वलय् म्हिगः चैत २० गते प्रदेश–१ या झापा, मोरंग व सुनसरी जिल्लाय् यातायात बन्द याःगु दुसा थौं मुक्कं प्रदेश बन्दया आह्वान यानातःगु दु ।
नामाकरण विरुद्धया आन्दोलनयात समर्थन यासें म्हिगः २३ म्ह लिम्बु कानून व्यवसायीतय्सं मंकाः वक्तव्य पिकाःगु दु । याक्थुङ (लिम्बु) लयर्स एसोसियसनपाखें संयोजक अ. थाइन्द्र आङबुहाङ लगायत २३ म्ह लिम्बु कानून व्यवसायीतय्सं पिकाःगु उगु मंकाः वक्तव्यय् कोशी नामाकरण विरुद्धया आन्दोलन झन् झन् तच्वयाच्वंगु इलय् नं सरकारं संविधानया धारा ५१ (क) (१), (२), ञ (८) व (९) बमोजिम समस्या समाधान यायेत छुं पहल मयाःगु द्वपं बियातःगु दु ।
वंगु छुं न्हि न्ह्यः तिनि थीथी पेशाय् आवद्ध जुयाच्वंपिं ४३ म्ह लिम्बु बुद्धिजीवीतय्सं नं छगू मंकाः वक्तव्य पिकासें कोशी नांया विरुद्ध जुयाच्वंगु आन्दोलनयात समर्थन याःगु खः ।
थ्वहे झ्वलय् आन्दोलन तच्वया वनेवं माओवादी केन्द्रया प्रदेश कमिटीं नं थःगु गल्ती भिंकुसें प्रदेशया नामाकरण पहिचानया आधारय् हे जुइमाः धइगु धापू न्ह्यःने तये हःगु दु । माओवादी केन्द्र्रया कोशी प्रदेश कमिटी अध्यक्ष हर्कबहादुर नेम्बाङ (मिक्सो) व सचिव गणेश उप्रेती (सुशीलं) म्हीग छगू वक्तव्य पिकासें प्रदेश पुनः नामाकरण यायेमाःगु व थुकिया लागिं जुयाच्वंगु शान्तिपूर्ण आन्दोलनप्रति समर्थन दुगु खँ स्पष्ट याःगु खः । अथे हे म्हिगः जनता समाजवादी पार्टी (जसपा) का अध्यक्ष उपेन्द्र यादवं नं छगू वक्तव्य पिकासें ‘कोशी प्रदेश’ नामाकरणयात थःपिनि पार्टीं स्वीकार मयानागु व मेगु नां मतःतले ‘प्रदेश १’ हे नां छ्यलेगु खँ धयादीगु दु ।
कोशी प्रदेशय् न्ह्यानाच्वंगु थ्व आन्दोलनया समर्थनय् छुं न्हि न्ह्यः तिनि येँय् नं छगू प्रदर्शन जूगु खःसा उकी कोशी जक मखु बागमती प्रदेशया नं नां हिलाः पहिचानया आधारय् नां तयेमाःगु माग जूगु खः । आन्दोलनकारीतय्सं आः बागमती प्रदेशया नापनापं लुम्बिनी प्रदेशया नां नं हिलेमाःगु माग याना हःगु दु ।
थ्वहे झ्वलय् छुं आन्दोलनकारीतय्सं ‘कोशी प्रदेश’ या पक्षय् मत बिउपिं प्रदेशसभाया सांसदतय्त प्रदेशय् दुमकायेगु आन्दोलन न्ह्याकेमाः धकाः नं सः तया हःगु दु ।
LEAVE YOUR COMMENTS