‘नेवाः–ताम्सालिङ’ प्रस्ताव दर्ता
येँ – प्रदेश ३ या नां ‘नेवाः–ताम्सालिङ’ तयेमाःगु प्रस्ताव प्रदेशसभाय् दर्ता जूगु दु । सांसद ओमबहादुर ग्लान व प्रतिमा श्रेष्ठपिंसं सांसदपिं प्रेमबहादुर तामाङ, रत्नप्रसाद ढकाल व सीता अधिकारीया समर्थनय् बिहीवाः प्रदेशसभा सचिवालयय् उगु प्रस्ताव दर्ता यानादीगु खः ।
प्रस्ताव दर्ता लिपा सांसद ग्लानं पहिचान कायम जुइ कथं व द्वन्द्व मजुइ कथं प्रदेशया नां ‘नेवाः–ताम्सालिङ’ तयेमाःगु दावी यानादिल । वय्कलं संघीय गणतन्त्रात्मक नेपाःया राज्य पुनर्संरचना याःबलय् पहिचान व सामथ्र्ययात मू आधार माने यायेगु सहमति कथं नं ३ नम्बर प्रदेशया नां ‘नेवाः ताम्सालिङ’ जुइमाःगु दावी यानादिल ।
थ्व स्वयां न्ह्यः सांसद विशाल खड्कां प्रदेशया नां ‘गौरीशंकर’ जुइमाः धकाः प्रस्ताव दर्ता यानादीगु खः । थुगु
‘गौरीशंकर’ प्रस्तावयात कयाः थ्वहे वइगु जेठ १२ गते अन्तक्र्रिया जुइत्यंगु दु । येँया बानेश्वर इन्द्रेणी फुडल्यान्डय् कलाकार मदनदास श्रेष्ठ दुथ्याःगु छगू पुचलं उगु अन्तक्र्रिया यायेत्यंगु खः ।
सांसद खड्कां कार्यव्यवस्था समितिया म्हीग च्वंगु बैठकं प्रदेशया राजधानी क्वःछीगु बारे कार्यविधि पास याःगु जानकारी नं नेपालभाषा टाइम्सयात बियादीगु दु । उगु कार्यविधि कथं प्रदेशया राजधानी गन तयेगु धइगु बारे मतदान जुइ ।
राजधानी विशेष अध्ययन समितिं बिउगु प्रतिवेदनय् दुथ्याःगु नामय् वर्णानुक्रम कथं मतदान जुइ । प्रतिवदेनय् छसिकथं काभ्रे, चितवन, नुवाकोट, ख्वप व हेटौंडाया नां दु । मतदानय् यदि काभ्रेया पक्षय् दुई तिहाइ वल धाःसा काभ्रे हे स्थायी राजधानी जुइ । थुकी दुई तिहाइ मवल धाःसा वयां क्वय्या नामय् मतदान जुइ ।
मतदानया मिति क्वःछीगु अधिकार सभामुख सानु श्रेष्ठयात बिउगु दु । काभ्रे पक्षधर सांसदतय्सं बजेट स्वयां न्ह्यः हे राजधानी बारे निर्णय यायेमाःगु अडान कयाच्वंगु दु । सभामुख श्रेष्ठ धाःसा बजेट भाषण लिपा जक प्रदेशया नां व राजधानी बारे निर्णय याकेगु पक्षय् दीगु खँ धाःगु दु । वय्कलं आः बजेट शेसन जूगुलिं बजेट लिपा जक प्रदेश बारे सहलह जुइगु खँ कनादीगु दु ।
LEAVE YOUR COMMENTS