तिलगंगायात डब्लुएचओ समन्वय केन्द्रया मान्यता

येँ – तिलगंगा आँखा प्रतिष्ठानं विश्व स्वास्थ्य संठगन (डब्लुएचओ)पाखें ‘डब्लुएचओ समन्वय केन्द्र’या मान्यता प्राप्त याःगु दु । प्रतिष्ठानं डब्लुएचओपाखें उकथंया मान्यता कायेवं नेपालं मिखाया क्षेत्रय ऐतिहासिक सफलता प्राप्त याःगु अर्थय् काःगु दु । डब्लुएचओपाखें उकथंया मान्यता काःगु तिलगंगा आँखा प्रतिष्ठान न्हापांगु संस्था नं जूगु दु ।

मिखाया स्वास्थ्य सेवा, शिक्षा, तालिम, जनशक्ति उत्पादन, अनुसन्धान लगायतया क्षेत्रय् प्रतिष्ठानं राष्ट्रिय व अन्तर्राष्ट्रिय रुपय् महत्वपूर्ण ज्या याःगु धासें विश्व स्वास्थ्य संगठन डब्लुएचओं प्रतिष्ठानयात समन्वय केन्द्रया मान्यताया दसिपौ लःल्हाःगु खः ।डब्लुएचओया देशीय प्रतिनिधि डा. जोस भ्यान्डेलारं प्रतिष्ठानया कार्यकारी अधिकृत प्रा. डा. रिता गुरुङयात उगु दसिपौ लःल्हानादीगु खः ।

सन् १९९४ य् स्थापना जूगु प्रतिष्ठानं आतकया दुने खुसलं मल्याक नेत्ररोग विशेषज्ञ, न्हय्सलं मल्याक मिखा सम्बन्धी स्वास्थ्यकर्मि, झिद्वः स्वयां अप्वः सामुदायिक स्वास्थ्य कार्यकर्ता व झण्डै न्हय्द्वः चिकित्सा क्षेत्रया विद्यार्थीयात मिखा सम्बन्धी थीथी विषयय् तालिम बी धुंकूगु दु ।

प्रतिष्ठानयात उकथंया मान्यता बीकेया निंतिं थिमिइ च्वंगु सार्क क्षयरोग केन्द्रं डब्लुएचओया समन्वय केन्द्रया मान्यता प्राप्त याःगु खःसा डब्लुएचओं आतकया दुने विश्वया ८० गू देय्या झण्डै च्यासः केन्द्रयात उकथं समन्वय केन्द्रया मान्यता बी धुंकूगु दु । मिखा सम्बन्धी स्वास्थ्यया अनुसन्धानय् नं दकलय् न्ह्यःने लानाच्वंगु प्रतिष्ठानं २१० अनुसन्धान यानाः १८३ शोधग्रन्थ नं पिथने धुंकूगु दु ।