शताब्दी पुरुष जोशीया १०० दँ दछियंकं थीथी ज्याझ्वः यासें हनीगु

यल – यल महानगरपालिकां वाङ्मय शताब्दी पुरुष सत्यमोहन जोशी १०० दँ क्यंगु लसताय् शताब्दी जन्मोत्सव ज्याझ्वः दछियंकं थीथी ज्याझ्वः यासें हनीगु जूगु दु । यल मनपापाखें छगू पत्रकार सम्मेलन यासें शताब्दी पुरुष जोशीया सछिदँया लसताय् दछियंकं थीथी ज्याझ्वः यासें हनेगु जानकारी बिउगु खः ।

यल मनपां बुधवाः याःग पत्रकार सम्मेलनय् शताब्दी पुरुष जोशीया शताब्दी जन्मोत्सवया लसताय् वइगु वि.सं.या न्हूदँकुन्हुनिसें हे थीथी ज्याझ्वःत याना वनेगु व दछियंकं ज्याझ्वः यानाः वयकःया शताब्दी जन्मोत्सव हनेगु जानकारी बिउगु खः । शताब्दी पुरुष जोशीया १०० दँया विशेष ज्याझ्वः हनेगु निंतिं छगू मूल समारोह समिति नं गठन याःगु दु ।

यल मनपाया प्रमुख चिरिबाबु महर्जनया संयोजकत्वय् १११ म्ह दुजः दुथ्याःगु मूल समारोह समिति गठन याःगु खः ।यल मनपां पत्रकार सम्मेलनय् बिउगु जानकारीकथं शताब्दी जन्मोत्सवया लसताय् दछिया दुने शताब्दी पुरुष जोशीय किपा दुगु हुलाक टिकट पिथनेगु, लुँया पाँय्म्वः पिथनेगु लगायत थीथी ज्याझ्वः याइगु जूगु दु । वि.सं. १९७७ साल बैशाख ३०गते कुन्हु यलया बखुंबहालय् जोशीया जन्म जूगु खः ।