येँया दमकल भवन थुनाः न्हू दयेकीगु

येँ – थनया न्हू सतकय् च्वंगु जुद्ध वारुणयन्त्र तयातःगु छेँ थुनीगु जूगु दु । वंगु २०७२ वैशाख १२ गते ब्वःगु भुखाचं उगु छेँयात बांमलाक लिच्वः लाकूगुलिं थुनाः पुलांगु हे पहः वयेक न्हूगु छेँ दनीगु खँ धाःगु दु ।

भवन जीर्ण जूगुलिं मानवीय खतरायात ध्यानय् तयाः उगु भवन थुनाः न्हूगु दयेकेत्यंगु खँ महानगरपालिकां धाःगु दु । मनपां न्हूगु भवन दयेकेगु निंतिं १० करोड तका बजेट फ्यानातःगु दु । थौंकन्हय् उगु जुद्ध वारुणयन्त्रय् ३४ म्ह कर्मचारीं ज्या यानाच्वंगु दु । अनया २ रोपनी ३ आना जग्गाय् आः न्हूगु भवन दयेकेत्यंगु खः ।

थौंकन्हय् भवनया ग्राउन्ड फ्लोरय् सन् १९९२ सालय् बेलायतं हःगु ‘मोरिस’ कम्पनीया निगः पुलांगु दमकल संग्रह यानातःगु दुसा तयारी अवस्थाया न्यागः दमकल तयातःगु दु । येँ महानगरपालिकां न्हू दयेकेत्यंगु भवनया निगूगु तलाय् कर्मचारीया आवास व स्टोर तइसा स्वंगूगु तल्लाय् सछि व नीम्ह न्ह्यंगु सभा हल दयेकेगु योजना दयेकातःगु दु ।

वि.सं १९९० सालया तःभुखाय् ब्वःगु प्यदँ लिपा जुद्ध वारुणयन्त्र स्थापना याःगु खः । अथेहे येँय् वारुणयन्त्र थापना जूगु प्यदँ लिपा यल व ख्वपय् नं वारुण यन्त्र स्थापना याःगु खः ।