राजधानीया विवाद पिमकाये – मुख्यमन्त्री

धौख्यः – राजधानीयात कयाः छुं कथंया कचवं पिमकायेत प्रदेश नम्बर ३ या मुख्यमन्त्री डोरमणि पौडेलं इनाप यानादीगु दु । वय्कलं म्हिगः ध्यौख्यः नगर–पालिकाया ३२ क्वःगु स्थापना दिवसया ज्याझ्वलय् न्ववायेगु झ्वलय् उगु खँ धयादीगु खः । वय्कलं धयादिल, ‘आः स्थायी राजधानीयात कयाः न्ववायेगु ई मत्यःनि । ई वल धाःसा थुकिया बारे सहलह यायेगु जुइ ।’

सरकारं प्रदेश नम्बर ३ या अस्थायी राजधानी मकवानपुरया हेटौंडायात क्वःछिनातःगु दु । तर अन छगू निगू संसद बैठक च्वनेधुंकाः धाःसा हेटौंडाय् राजधानी पायक मजुल धासें अनं मेथाय् राजधानी सरे यायेमाःगु माग आपालं सांसदपिंसं याना वयाच्वंगु दु ।

वय्कलं न्ह्यःने धयादी, ‘जिगु निंतिं झिंस्वंगुलिं जिल्ला बराबर खः, प्रदेशसभा बैठक न्ह्यायेधुंकाः छसिकथं राजधानीया विषयय् नं खँ वइ, आः हे हथाय् चायेगु उचित जुइ मखु ।’

वय्कलं प्रदेशया मन्त्रालयं छु यायेगु छु मयायेगु धइगु खँ अझ नं अन्योलय् दुगु खँ कनादिसें संसदया बैठकत नं छु यायेगु धकाः फुक्कं अन्योलया दथुं न्ह्यानाच्वंगु खँ नं कनादिल । राजधानी ला आवश्यकतां गन धाइ अथे हे याये मालीगु बिचाः नं वय्कलं प्वंकादिल ।

ज्याझ्वलय् एमालेया सांसद गोकुल बास्कोटां धाःसा भौगोलिक रुपय् काभ्रे पाय्छि जुइ धासें प्रदेशया राजधानी काभ्रेय् हे तयेत इनाप यानादीगु खः ।
दोलखा, रामेछाप, रसुवा, नुवाकोट आदि जिल्लाया सांसदतय्सं यातायात सुविधा मदयाः येँय् बाय् च्वनाः तिनि हेटौंडा वये माःगु जुयाः अन राजधानी पायक मजू धयाच्वंगु दु । नगरपालिकां पुलांम्ह नगर प्रमुख बेलप्रसाद श्रेष्ठ व हास्य कलाकार हरिवंश आचार्यपिंत सम्मानित याःगु खः ।