स्वनिगःया नेवाः मुस्मांत नं संगठित जुइगुपाखे
येँ – नेपालय् दुपिं नेवाः मुस्मांतय्त छप्पँ छधी यायेगु निंतिं नेवाः मुस्लिम समाज नीस्वंगु दु । थनिं लत्या न्ह्यः भाजु निसार उद्दिनया अध्यक्षताय् नेवाः मुस्लिम समाज नीस्वंगु खः । अध्यक्ष उद्दिनं स्वनिगलय् नेवाः मुस्मांत लिच्छवीकालंनिसें बसोबास याना वयाच्वंगु खँ कँसें येँ, यल व ख्वपय् नेवाः मुस्मांत च्वनाच्वंगु खँ कनादिल ।
वय्कःया कथं लिखित रुपं नेपालय् रत्न मल्लया पालंनिसें नेवाः मुस्मांत च्वनाच्वंगु प्रमाण दु । स्वनिगलय् येँया वतु, बागबजाः व थँबही लागाय् नेवाः मुस्मांत न्हापांनिसें च्वना वयाच्वंगु खँ वय्कलं कनादिल । लिसें यलया मंगलबजाः, तंगः व बालकुमारी नं नेवाः मुस्मां वस्ती दुगु जानकारी वय्कलं बियादिल ।
वय्कःया कथं ख्वपय् नं झिखा ति नेवाः मुस्मां परिवार बसोबास याना वयाच्वंगु दु । नेपालय् च्वनाच्वंपिं नेवाः मुस्मांतय्सं थौं तकं थःपिनिगु
पुर्खौली पेशा हे याना वयाच्वंगु दनि । नेवाः मुस्मांतय्सं पुख्र्यौली पेशा कथं पोते चुरा मीगु ज्या याना वयाच्वंगु खः ।स्वनिगः दुने नेवाः मुस्मांतय् जनसंख्या गुलि दु धइगु पाय्छि ल्याः धाःसा पिहां वःगु मदुनि ।
अथे खःसां थौंकन्हय् विश्वन्यंकंया मुंस्मांतय् तःधंगु नखः रमदान न्ह्यानाच्वंगु जुयाः थ्व नखः क्वचायेवं हे नेवाः मुस्मांतय् तथ्यांक कायेगु ज्या न्ह्याकेगु खँ नायः उद्दिनं कनादिल । वय्कलं कनादीकथं थुगुसी सरकारं काइगु राष्ट्रिय जनगणनाय् आः थःपिंसं ‘नेवाः मुस्मां’ धकाः हे पहिचान खुले जुइकथं च्वकेगु लागिं तयारी नं यानाच्वंगु दु ।
नेवाः मुस्मांत च्वनाच्वंगु परम्परागत लागाय् व्यापारिक रुपं विकास जुया वनाच्वंगुलिं आः कोर एरियाय् च्वनीपिं नेवाःत उगु थासं विस्थापित जुयाच्वंगु खँ धासें तर उमिसं थःपिंत नेवाः मुस्मां धकाः म्हसीका बीचाहे जूगु खँ नं वय्कलं कनादिल ।
थ्व नेवाः मुस्मांतय्सं स्वनिगः दुने न्यायेकीगु थीथी नेवाः नखः चखः व जात्रा पर्वय् नं ब्वति कायेगु यानाच्वंगु दु । उपिं मूलतः नेवाः भासं हे खँ ल्हाइपिं खःसां उमि दथुइ नं नेवाः भाय् ल्हाइपिं धाःसा म्हो जुया वनाच्वंगु दु ।
LEAVE YOUR COMMENTS