
येँ – वंगु नीखुन्हु न्ह्यवंनिसें येँया थीथी थासय् मुनाच्वंगु फोहोर बुधवाः सुथय् निसें मुनिगु जूगु दु । मंगलवाः येँ महानगरपालिकाया मेयर विद्यासुन्दर शाक्यया संयोजकत्वय् येँया प्रमुख जिल्ला अधिकारी, सतक विभागया महानिर्देशक, प्रहरी वरिष्ठ उपरीक्षसहितया बैठकं बुधवाः सुथय् निसेंं फोहोर मुनेगु निर्णय याःगु खः ।
येँ मनपाया प्रमुख शाक्यं वंगु इलय् स्थानीय सिसडोल वासिन्दाया माग सम्बोधन याना वयाच्वनागु खँ धासें आः नं जायज व येँ मनपां सम्बोधन यायेफइगु माग पूवंकेत थः सकारात्मक जूगु खँ नं धयादीगु दु । उकथं हे येँया प्रमुख जिल्ला अधिकारी कालीप्रसाद रिजालं बैठकं स्वंगू निर्णय याःगु खँ धासें न्हापांगु निर्णय स्वनिगःया फोहोर बुधवाः सुथय्निसें मुनेगु ज्या न्ह्याकेगु जूगु खँ धयादिल ।
अथे हे वय्कलं सतक विभागं येँ मनपा लिसे समन्वय यानाः तत्काल लँ दयेकेत व्यवस्थापन यायेगु व फोहोर वायेगु झ्वलय् सुरक्षा चुनौति खनेदत धाःसा शान्ति सुरक्षा गृह प्रशासनं मिले यायेगु जानकारी नं बियादिल । उकिया निंतिं जिल्ला प्रशासन कार्यालय नुवाकोट व येँया दथुइ समन्वय यानाः सुरक्षा प्रबन्ध यायेगु निर्णय जूगु खँ वय्कलं धयादिल ।
फयांफछि स्थानीय वासिन्दायात सम्झे यायेगु थःपिनिगु न्हापांगु प्राथमिकता जूगु धासें बल प्रयोग यायेगु अवस्था मवयेकेत कुतः जुइगु खँ धयादिल । यदि सम्झे बुझे यानाः नं पंगः थनेगु कुतः जुल धाःसा बल प्रयोग यायेत थम्हं सुरक्षा निकाययात आदेश बीधुनागु खँ नं कनादिल । उकथं हे येँया प्रहरी प्रमुख प्रहरी वरिष्ठ उपरीक्षक अशोक सिंह नं बल प्रयोग यानाः जूसां फोहर वायेगु व्यवस्था यायेगु खँ धयादिल ।
LEAVE YOUR COMMENTS