२ प्रतिशत ब्याज पूसां गाइगु व्यवस्था

येँ – बैंकय् त्यासा कयातःपिं भुखाय् पीडित जनतां आः २ प्रतिशत ब्याजदरं हे किस्ता पूसां गाइगु व्यवस्था जूगु दु । नेपाल राष्ट्र बैंकं भुखाय् पीडित जनतायात बिउगु त्यासाया कार्यविधि संशोधन यानाः थ्व व्यवस्था याःगु खः । भुखाय् पीडित जनताया त्यासाया ई म्होतिं नं न्यादँ व अप्वलय् झिदँया जुइ ।

पुनर्कर्जाया ई फुइधुंकाः च्यादँ तक ब्याज अनुदान बिउगु खँ नेपाल राष्ट्र बैंकं धाःगु दु । आः संशोधन जूगु कार्यविधि कथं भुखाय् पीडित जनतायात बीगु त्यासायात विपन्न त्यासाय् गणना याये फइगु व्यवस्था याःगु दु ।

राष्ट्र बैंकं भुखाय् ब्वयेधुंकाः निदँ तक शुन्य ब्याजदरं त्यासा कायेफइगु व्यवस्था याःगु खःसा लिपा पुनर्कर्जा ऐन संशोधन यानाः निदँया निंतिं जक यायेवं भुखाय् पीडित जनतां संघर्ष समिति गठन यानाः राष्ट्र बैंक, राष्ट्रिय पुनर्निर्माण प्राधिकरण व अर्थमन्त्रीयात ज्ञापन पौ बियाः थःपिनि समस्या अवगत याकूगु खः ।

आः पुनर्कर्जा ई क्वचायेवं निक्षेप लगायतय् २ प्रतिशत थप यानाः ब्याज कायेदइगु व्यवस्था याःगु खँ राष्ट्र बैंकया प्रवक्ता नारायणप्रसाद पौडेलं ‘नेपालभाषा टाइम्स’ यात कनादिल । बैंकतय्सं भुखाय् पीडित जनतायात बिउगु त्यासा उठे याये छेँ लिलामी प्रक्रियाय् वनेगु तयारी समेत यायेधुंकूगु खः ।

सम्बन्धित बुखँ

LEAVE YOUR COMMENTS