चकं दबू (खुला मंच) या शटर थुन

येँ – येँया चकं दबू (खुला मंच) दुने अवैध रुपं दयेका तःगु शटर म्हिगः येँ महानगरपालिका व येँ जिल्ला प्रशासन कार्यालयं थुना बिल । अन शटर थुनेगु ज्याय् येँ मनपाया मेयर विद्यासुन्दर शाक्य थः नं न्ह्यःने च्वनादीगु खःसा उपमेयर हरिप्रभा खड्गी थुनेगु ज्या क्वचायेधुंकाः थ्यंकः वःगु खः । अन शटर थुनेगु लागिं प्रधानमन्त्री केपी ओलीं समेत निर्देशन बियादीगु खँ धाःगु दु । ठेकेदार कम्पनी जलेश्वर स्वच्छन्द विकोई बिल्डर्स प्रालिं येँमनपायाके अनुमति मकासे अन शटर दयेकाः बालं बियाच्वंगु खः ।

स्थानीय व्यापारीतय्सं अन छगू शटरया खुगू लाखंनिसें १५ लाख तका तक पुलाः न्याःगु खः । शटर थुंगु इलय् प्रमुख जिल्ला अधिकारी राम प्रसाद आचार्य, मेयर विद्यासुन्दर शाक्यलिसें थीथी वडाया जनप्रतिनिधितय् उपस्थिति दुगु खः । येँया पुलांगु बसपार्कय् काठमाडौं टावर दयेकेगु ज्या जुइवं अनया बस खुल्ला मञ्चय् पार्किङ याये हःगु खः । तर बसपार्क व्यवस्थापनया जिम्मा ठेकेदार कम्पनीयात बिउगु खःसा ठेकेदार कम्पनीं अन शटर दयेकाः बालं बीगु ज्या समेत याःगु खः ।

शटर थुनेवं अन पसः तयाच्वंपिसं थःपिंसं मनोज भेटवालयाके शटर बालं कयागु खँ कँसें अन सलामी पुलाः कयागु शटर थुना बिउगुलिं थःपिंत अन्याय जूगु खँ धाःगु दु । ध्यबा लगानी यानाः पसः तयेधुंकाः थुना बिउगुलिं थःपिंत अन्याय जूगु खँ उमिसं धाःगु दु । तर शटर बालं कायेत उमिसं सुंलिसे छुं लिखित सम्झौता धाःसा यानातःगु मदु ।

अन ठेकेदार कम्पनीं ४३ गू पसः कवः पिकया तःगु खः । शटर थुनेगु शुरु यायेवं गुलिखे व्यापारीतय्सं हथासं सामान चीकूगु खःसा गुलिस्यां सामान लिकाये तकं मखंगु खँ धाःगु दु । प्रमुख जिल्ला अधिकारी आचार्यं महानगरया इनाप कथं शटर थुनेज्या जूगु खँ कनादीगु दु । मेयर शाक्यं सार्वजनिक थासय् गलत तरिकां शटर दयेकूगुलिं शटर थुनागु खँ कनादिल ।

सम्बन्धित बुखँ

LEAVE YOUR COMMENTS