लुँया भावय् न्हियान्हिथं न्हूगु रेकर्ड

येँ (नेपालभाषा टाइम्स)- थौंकन्हय् न्हिथं लुँया भाः थहां वनाः न्हिथं न्हून्हूगु रेकर्ड कायम जुयाच्वंगु दु । म्हिगः लुँ तोलां १ हजार तका थहां वनाः १ लाख ४५ हजार थ्यंगु दु । म्हीगः१ लाख ४४ हजार कायम जुयाः न्हूगु रेकर्ड तःगु लुँ भावं म्हिगः हाकनं न्हूगु रेकर्ड तःगु खः ।

अन्तर्राष्ट्रिय बजारय् लुँया भाः थहां वंगु कारणं नेपालय् नं लुँया भाः थहां वनाच्वंगु खः । स्वीट्जरल्याण्डया सेन्ट्रल बैंक, क्यानाडाया सेन्ट्रल बैंक व युरोपियन बैंकतय्सं ब्याज दर क्वकाःगुलिं अन्तर्राष्ट्रिय बजारय् लुँ भाः थहां वंगु खँ नेपाल सुनचाँदी व्यवसायी महासंघया अध्यक्ष लिसें बजाः विश्लेषक तेजरत्न शाक्यं ‘नेपालभाषा टाइम्स’यात कनादीगु दु ।

विश्वया प्रमुख बैंकतय्सं ब्याजदर म्हो यायेवं अमेरिकाया फेडेरल बैंकं नं ब्याजदर क्वकाये फइगु अनुमान यानाः लगानीकर्ता लुँइ आकर्षित जुइवं लुँया भाः थहां वंगु खँ नं वय्कलं कनादीगु दु । वय्कःया कथं आम्दानीया स्रोत सुनिश्चित यायेत लगानीकर्तात लुँइ लगानी यायेत आकर्षित जूगु खः ।

म्हिगः सुथय् नेपाःया बजाः चाःगु इलय् अन्तर्राष्ट्रिय बजारय् लुँ प्रति औंश २३८४ डलर थ्यंगु खःसा म्हिगः न्हिनय् ४ बजे तक भाः कुहां वयाः २३३६ डलर कायम जूगु खः । म्हिगः छन्हुया ४६ डलर कुहां वःगु नं न्हूगु रेकर्ड जूगु खँ वय्कलं कनादीगु दु । वय्कःया कथं न्हापा न्हापा जूसां छन्हुया दुने दकलय् अप्वः १० डलर तक थहां कुहां जुइगु खः ।

थ्व स्वयां न्ह्यः अमेरिकी फेडरल बैंकं जनवरी महिनाया न्हापांगु वालय् ब्याजदर क्वकायेगु धाःगु खःसां लिपा वनाः मुद्रास्फीति नियन्त्रणय् दुगु धासें ब्याजदर क्वमकासे च्वनाच्वंगु खः । दछिया दुने स्वक्वः तक ब्याजदर क्वकायेगु न्हापाया योजनायात अमेरिकी फेडरल बैंक स्थगित यानातःगु दु ।

म्हिगः अन्तर्राष्ट्रिय बजारय् न्हूगु रेकर्ड कायम जूगु लुँया भाः थौं कुहां वयेफइगु अनुमान नं वय्कलं यानादीगु दु । म्हिगः अमेरिकी बजाः चालेधुंकाः अन्तर्राष्ट्रिय लुँया बजारय् गज्याःगु प्रभाव लाकीगु खः उकिया लिच्वः कथं अन्तर्राष्ट्रिय बजारय् लुँया भाः निर्धारण जुइगु खँ नं वय्कलं धयादीगु दु ।

 

सम्बन्धित बुखँ

LEAVE YOUR COMMENTS