अदालतपाखें प्राधिकरणया पक्षय् आदेश
मतया महसुलयात कयाः प्राधिकरण–उद्योगी विवाद
येँ – यल उच्च अदालतं उद्यमी व्यवसायीतय्सं नेपाल विद्युत प्राधिकरणयात मतया बक्यौता पुलेमाःगु फैसला न्यंकूगु दु । उच्च अदालतया न्यायाधीशपिं नरेन्द्र कुमार शिवाकोटी व राजनप्रसाद भट्टराईया मंकाः इजलासं थ्वयां न्ह्यव उद्योगीतय् पक्षय् बियातःगु अन्तरिम आदेश खारेज यासें न्यागू उद्योगतय्त महसुल पुलेत आदेश बिउगु खः ।
नेपाल विद्युत प्राधिकरणं ट्रक व डेडिकेटेड लाइनं मत कयातःपिंत बक्यौता पुलेत धायेवं प्राधिकरण व उद्यमी दथुइ विवाद ब्वलंगु खः । थ्व विवादयात कयाः जूगु मुद्दाय् पाटन उच्च अदालतं मतया महसुल सम्बन्धी प्राधिकरणया निर्णययात सदर यानाबिउगु खः । उच्च अदालत पाटनं रघुपति जुट मिल, अरिहन्त पोली म्याक्स, अरिहन्त मल्टी फाइबर, एभरेस्ट पेपर मिल व शुभश्री अग्नि सिमेन्टयात प्राधिकरणं बिउगु बिल कथं महसुल पुलेत आदेश बिउगु खः ।
उद्यमीतय्सं ट्रंक व डेडिकेटेड लाइनय् प्राधिकरणं गैरकानुनी रुपं महसुल कयाच्वंगु धासें थःपिंसं शुल्क मपुलेगु व शुल्क पुलेमाःसा उद्योग हे बन्द यायेगु धकाः ख्याच्वः बिया वयाच्वंगु खः । मेखे प्राधिकरणं धाःसा अप्वः सुविधा दइकथं मतया लाइन काःपिंसं अप्वः शुल्क पुलेमाःगु खँ धया वयाच्वंगु खः ।
ट्रंक लाइनपाखें हे थगुने असार तक प्यंगू अर्ब ३० करोडं मल्याक महसुल उठे यायेमानिगु खँ प्राधिकरणया कार्यकारी निर्देशक कुलमान घिसिङ धयादीगु दु ।
महसुलया खँय् नेपाल उद्योग वाणिज्य महासंघ लगायतया संगठनतय्सं संगठीत रुपं हे विरोध यायेवं प्राधिकरणं फुक्कं उद्योगया यथार्थ विवरण पत्ता लगे यायेत उद्योगय् छ्यलाच्वंगु टिडिओ मिटर अध्ययन जुयाच्वंगु खँ धाःगु दु । ट्रंक लाइनपाखें हे थगुने असार तक प्यंगू अर्ब ३० करोडं मल्याक महसुल उठे यायेमानिगु खँ प्राधिकरणया कार्यकारी निर्देशक कुलमान घिसिङ धयादीगु दु ।
वय्कःया कथं डेडिकेटेड लाइनपाखें मत कयाच्वंपिं उद्योगी, व्यवसायी, अस्पताल, खानेपानी थेंज्याःगु संस्था व कम्पनीं नियमित रुपं ध्यबा पुलाच्वंगु दु । तर गुबलें हे काटे मजुइकथं ट्रंक लाइनपाखें मत कयाच्वंपिं उद्योगी व्यवसायीत धाःसा प्राधिकरणं अप्वः शुल्क काःगु धासें अदालत वंगु खः । ट्रंकलाइन व डेडिकेटेड लाइन पाखें प्राधिकरणं व्यवसायीतय्त ३१५ मेगावाट मत बिया वयाच्वंगु खः ।
LEAVE YOUR COMMENTS