
येँ – वा वयेगु सुरु जुयावयेवं पुलांगु बसपार्कय् यात्रुतय्सं सास्ती फये मालावःगु दु । वा मवइबलय् धुलं सास्ती जुइगु खःसा वा वयेगु सुरु जुइवं ध्याचलं यानाः सास्ती जुयाच्वंगु दु । पुलांगु बसपार्क थौंकन्हय् खुल्लामञ्चय् सरे यानातःगु दु । न्हापा बसपार्क तयातःथाय् भ्युटावर दयेकेगु धकाः बसपार्कयात खुलामञ्चय् सारे यायेहःगु खः ।
बसपार्क तयातःथाय् भ्यु टावर दयेकेगु धकाः प्यदँ न्ह्यव हे येँ महानगरपालिकालिसे सम्झौता याःगु ठेकेदार कम्पनीं धाःसा भ्यु टावर दयेकेगु निंतिं छुं ज्या धाःसा याःगु मदुनि । बसपार्कया थाय्यात जस्तां घेरे जक यानातःगु दु । मेखे खुल्लामञ्चय् सरे याःगु बसपार्कय् धाःसा थाय्थासय् गाः वनाः लः जमे जुइगु जुयाच्वंगु दु ।
लः जाइगुलिं यानाः यात्रुतय्त बस गःवनेत तकं समस्या जुयाच्वंगु दु । थ्व बसपार्क येँ महानगरपालिका २८ वडा अन्तर्गत लाः । २८ वडाया वडाअध्यक्ष भाइराम खड्गीं राससलिसे खँ ल्हासें बसपार्क दयेकेगु ज्या केन्द्रीकृत जुयाच्वंगुलिं समस्या जूगु खँ धयादीगु दु । वय्कलं थ्व विषययात कयाः वइगु नगरपरिषद्या बैठक उठे यायेगु खँ धयादीगु दु ।
वा वइगु इलय् खुलामञ्चपाखें लः बाः वयाः बस दिकेथाय् थ्यंकः लः जाम जुइगु जुयाच्वंगु दु । थन धःया नं बांलाक व्यवस्था यानामतःगुलिं नवयेक धः नं बाः वइगु खँ नियमित यात्रुतय्सं धाःगु दु ।अण्डरग्राउण्ड बसपार्क दयेकेगु धकाः भ्यूटावर दयेकेगु ठेक्का काःगु कम्पनीं ज्या मयाःगुलिं नगर दुनेया बसपार्कय् थज्याःगु अवस्था खने दयाच्वंगु खः । भ्यूटावर दयेकेगु सम्बन्धी उजुरी अख्तियार दुरुपयोगु अनुसन्धान आयोगय् लायेधुंकूगु दु ।
LEAVE YOUR COMMENTS