मोबाइल सेवा नवीकरण एनसेलं ४ अर्ब पुल टेलिकमय् विरोध

येँ – टेलिकम सेवा प्रदायक कम्पनी एनसेलं मोबाइल सेवा संचालनया लाइसेन्स नवीकरण यायेगु निंतिं नेपाल दूरसञ्चार प्राधिकरणयात न्हापांगु किस्ता कथं प्यंगू अर्ब पूगु दु । प्राधिकरणं न्यादँया निंतिं लाइसेन्स नवीकरण यायेत २० अर्ब दां शुल्क तोके यानातःगु दु । एनसेलं न्हापांगु किस्ता पूसां सरकारी स्वामित्व दुगु मेगु तःधंगु टेलिफोन कम्पनी नेपाल टेलिकमय् धाःसा नवीकरण शुल्क पुलेगु खँय् अन्यौल जुयाच्वंगु दु ।

प्राधिकरणं नवीकरण शुल्क २० अर्ब धायेवं नेपाल टेलिकमया कर्मचारीतय्सं थुकिया विरोध यानाच्वंगुलिं यानाः टेलिकमया व्यवस्थापन पक्ष धाःसा दबाबय् लानाच्वंगु खः । कर्मचारीतय्सं सरकारं हे सरकारी कम्पनीयात धरासायी यायेत स्वयाच्वंगु द्वपं बिसें लाइसेन्स नवीकरणया निंतिं जक २० अर्ब दां पुलेमाल धाःसा कम्पनी हे धरासायी जुइगु खँ धयाच्वंगु दु ।

टेलिकम कर्मचारीपाखें सरकारं हे सरकारी कम्पनीयात धरासायी यायेत स्वयाच्वंगु द्वपं

दूरसंचार प्राधिकरणं लाइसेन्स नवीकरण शुल्क २० अर्ब तोके यायेवं टेलिकमया कर्मचारी संगठनतय्सं पत्रकार सम्मेलन हे यानाः थुकिया विरोध याःगु खः । तर मन्त्रिपरिषदं हे २० अर्ब शुल्कयात पारित यासें थ्व ध्यबा न्यागू किस्ता यानाः पुलेफइ धायेवं आः टेलिकम नं शुल्क पुलेत बाध्य जुइगु खँ धाःगु दु ।

मन्त्रिपरिषद्या निर्णय वयेवं एनसेलं न्हापांगु किस्ता कथं प्यंगू अर्ब दां पूगु खः । आः हरेक दँय् आर्थिक दँ क्वचाये न्ह्यव प्यंगू प्यंगू अर्बया ल्याखं किस्ता पुलेमाःगु खः । दूरसंचार प्राधिकरणं वंगु चैतय् हे नवीकरण शुल्क २० अर्ब कायेगु क्वःछिउगु खः । थुकियात मन्त्रिपरिषद्ं पारित यानाः वंगु जेठ १६ गते संचार मन्त्री गोकुल बास्कोटां सरकारया निर्णय सार्वजनिक याःगु खः । मन्त्रिपरिषदं हे निर्णय यायेधुंकूगुलिं आः टेलिकमं नं किस्ता पुलेगु प्रक्रिया न्ह्याकीगु खँ धाःगु दु ।

सम्बन्धित बुखँ

LEAVE YOUR COMMENTS