भेनेजुयला ः म्हिगः व थौं
राष्ट्र संघ नीस्वने धुंकाः नं इलय् ब्यलय् थीथी देसय् अमेरिकी साम्राज्यवादया हस्तक्षेपया घटना लिसा कयाच्वंगु दु । आः नं दक्षिण अमेरिकी मुलुक भेनेजुयलाय् अमेरिकी साम्राज्यवादी आक्रमणया कारणं अशान्ति न्यनाच्वंगु दु । छगू इलय् अमेरिका धायेवं हे ग्यायेमाःगु अवस्था ब्वलंगु खः ।
खास यानाः निगूगु विश्वयुद्धया इलय् युद्धय् त्यायेवं अमेरिकायात छुं नं देसं प्रतिस्पर्धा याये फइमखुत धइगु धारणा ब्वलन । तर ई छगू हे कथं न्ह्यज्याइगु मखु जुयाच्वन । न्हापांगु विश्वयुद्ध व निगूगु विश्वयुद्धया इलय् अमेरिका तसकं हे शक्तिशाली देय् जूसां आः वयाः अमेरिकी साम्राज्यवादयात आणविक हतियार व शक्तिइ नं उलि हे हाथ्या बिइफुगु देय्त विश्वय् खने दयावःगु कारणं अमेरिका ग्यानाच्वंगु दु ।
गबलय् भेनेजुयलाय् अमेरिकी हस्तक्षेप सुरु जुल, उबलय् विश्वया न्याय प्रेमी जनतां छुं नं हालतय् भेनेजुयला थेंज्याःगु सार्वभौमसत्ता सम्पन्न देसय् अमेरिकी हस्तक्षेप जुइमजिउ धइगु सःयात तच्व याना यंकूगु खनेदु । थ्वहे झ्वलय् नेपालय् नं थीथी पत्रपत्रिका व सञ्चारमाध्यमपाखें लेख रचना व विचार मार्फत् अमेरिकाया विरोध यायेगु क्रम सुरु जुल ।
उगु इलय्या थ्व विरोधया सः छथाय् तयाः आः नकतिनि छगू सफू पिदन, ‘भेनेजुयला ः हिजो र आज’ । छगू सार्वभौमसत्ता सम्पन्न देसय् विदेशी हस्तक्षेप अपाच्य खः धइगु तायेकाः राष्ट्रसंघया महासचिव एन्टोनिओ गुतरेजं वक्तब्य जारी यानाः म्वाःमदुगु हस्तक्षेप मयायेत अमेरिकी राष्ट्रपति डोनाल्ड ट्रम्पयात इनाप याःगु खः ।
राष्ट्र संघया महासचिवं थ्व इनाप छुं मेमेगु सञ्चार माध्यममार्फत् याःगु मखुसें अमेरिकी सरकारया स्वामित्वय् प्रायोजित सञ्चार माध्यम भ्वाइस अफ अमेरिकां प्रशारण याःगु अन्तर्वार्ताया झ्वलय् यानादीगु खः । महासचिव गुटरेजं दक्षिण अमेरिकी देय् भेनेजुयलाय् छुं नं कथंया सैनिक हस्तक्षेप जुइमजिउगु खँ स्पष्ट यानादीगु खः ।
अमेरिकां थःगु रणनीति वा धारणा हिलाः समानता, न्याय व अनुशासन कायम याये धइगु भावना भ्या भचा हे क्यंगु मदुनि । विश्व न्यंकंया थीथी स्वतन्त्र राष्ट्रत अमेरिका खनाः अझं सशंकित दनि ।
तर अमेरिकाया नीति धयागु छुं नं देय्या सार्वभौमसत्ता स्वयेगु मखुकि थःगु देय्या हैकम कायम यानाः विश्व न्ह्यःने थः हे जक न्ह्यलुवा जुयाच्वनेथस खः । उकिं हे वं थाय् थासय् अमेरिकी नेतृत्वया सेना तयाः विश्वयात ख्यायेत स्वयाच्वंगु दु ।खय्त ला विश्वय् निगूगु विश्वयुद्ध लिपा शान्ति सम्झौता जुयाः आपालं देय् अमेरिकाया पक्षय् वंसां राष्ट्र संघया स्थापना नापनापं विश्वं शान्तिया लागिं पलाः ल्ह्वन धाःसां दुनं दुनं अशान्तिया स्थिति कायम हे जुयाच्वंगु दु ।
गब्ले तक अमेरिकां थःगु हैकम थीथी देसय् कायम यायेगु रणनीति हिली मखुनि अबलय् तक थन वास्तविक शान्ति कायम याये फइ मखुनि । इराकय् अमेरिकी आक्रमण, अफगानिस्तानय् अमेरिकी हस्तक्षेप व लिबियाय् अमेरिकी सैनिक गतिविधियात स्वयेगु इलय् अमेरिका छगू कथं विश्वया नामूद साम्राज्यवादी देय् खः, विश्वयात अशान्ति न्यंकीगु देय् खः धइगु स्पष्ट जू ।
अथे खःसां थौं अमेरिकां थःगु रणनीति वा धारणा हिलाः समानता, न्याय व अनुशासन कायम याये धइगु भावना भ्या भचा हे क्यंगु मदुनि । विश्व न्यंकंया थीथी स्वतन्त्र राष्ट्रत अमेरिका खनाः सशंकित दनि ।अमेरिकी राष्ट्रपति डोनाल्ड ट्रम्पं भेनेजुएलाय् सैनिक हस्तक्षेपया विकल्प मेगु यक्व दुगु खँ धयाच्वंगु दु ।
सैनिक हस्तक्षेपया विकल्प तयार जुयाच्वंगु खँ पिहां वयाच्वंगु इलय् नं संयुक्त राष्ट्र संघया महासचिव गुटरेजं दक्षिण अमेरिकी देय् भेनेजुयलाय् छुं नं कथंया सैनिक हस्तक्षेप जुइ मजिउगु प्रतिक्रिया बिउगु दु । छगू ल्याखं शान्तिया मूल लक्ष्य सहित स्थापना जूगु राष्ट्र संघपाखें वक्तब्य मार्फत् थ्व धारणा वःगुलिं विश्वया गुलिं राष्ट्रत आः नं निरिह जुइमाःगु अवस्था मुक्त जुयाच्वंगु दु ।
तर सुयातं टेरे हे मयाइम्ह अमेरिका व अमेरिकी सम्राज्यवादं आः नं राष्ट्र संघयात नां जकया राष्ट्र संघ कथं तयाः थःगु हे देय्या निर्णययात समर्थन चूलाकेत वा बः बिइगु ज्या याइगु सम्भावना नं खनेदयाच्वंगु दु । म्हिगः नं इरान, इराक, लिबिया व अफगानिस्तान थेंज्याःगु देसय् आक्रमण याःगु इलय् राष्ट्र संघ निरिह जुयाः अमेरिकां याःगु आक्रमण स्वयाच्वंगु खः ।
आः नं अमेरिकी साम्राज्यवादया न्ह्यःने हाकनं छक्वः निरिह जुयाच्वंगु दु । खय्त ला ल्याटिन अमेरिकाय् विदेशी हमला धइगु इतिहास हे जुइ धुंकूगु दु । न्हापा न्हापा नं थज्याःगु आक्रमण आपालं देसं आपालं भोगे याये धुंकूगु दु । तर थ्व इलय् धाःसा ल्याटिन अमेरिकी मुलुकत छगू हे थासय् च्वनाः अमेरिकी साम्राज्यवादया बिरोध यानाच्वंगु दु ।
छगू ल्याखं छगू देसय् आक्रमण यायेधुंकाः हाकनं मेगु देसय् नं आक्रमण याइ धइगु खँ स्पष्ट जू । थ्व इलय् अमेरिकां नं भेनेजुयलाया सिमानाय् राहत कथं खाद्य पदार्थ व वासः थ्यंकाच्वंगु ई खः । थ्व हे नं हतियारया रुपय् प्रयोग यायेफइगु खँय् ध्यान तयाः राष्ट्र संघं विज्ञप्ति हे पिथनाः उगु खाद्य सामग्री व वासःयात अमेरिकी साम्राज्यवादं हतियार कथं प्रयोग मयायेत आग्रह याःगु दु ।
राष्ट्र संघं भेनेजुयलाय् हःगु राहत सामग्रीयात माडुरो सरकारं देसय् दुत हयेत निषेध यानातःगु दु । थ्व इलय् माडुरो सरकारं नं शान्ति सम्झौताया सम्भावना अप्वयाच्वंगु महसुस यानाच्वंगु दु । थज्याःगु अवस्थाय् विश्व शान्तिया कामना यानाच्वनापिं झी नेपाःमितय्सं नं भेनेजुयलाय् अमेरिकी हस्तक्षेपया विरोध याये हे माः ।
शान्तिया खँ ल्हानाः दुनं दुनं छुरा सुइगु अमेरिकी साम्राज्यवाद प्रति सचेत जुयाः न्ह्यःने वनेमाः । राष्ट्र संघपाखें नं न्यायोचित समाधान मालाः थ्व इलय् ल्याटिन अमेरिकी देसय् न्यासः स्वयां अप्वः विदेशी विद्वानतय्सं धाःथें ल्याटिन अमेरिकी मुलुक भेनेजुयलायात नं अमेरिकी साम्राज्यवादया हस्तक्षेपं बचे यायेमाः ।
अमेरिकी साम्राज्यवादं आः नकतिनि जक भेनेजुएलाय् छम्ह न्यायाधीसयात राष्ट्रपति घोषणा याकाः उकी अन्तर्राष्ट्रिय समर्थन दु धकाः क्यनेगु नक्कली ज्या यागु दु । थज्याःगु इलय् विश्वया न्यायप्रेमी जनतायात अमेरिकी कथपुतली सरकार विरुद्धया धारणा तयार यानाः निर्वाचित व्यक्तियात सत्ता हस्तान्तरण याकेगु प्रजातान्त्रिक पद्धतिया समर्थन याकेमाःगु अवस्था वयाच्वंगु दु ।
मखुत धाःसा थन विश्वया गुगुं नं देसय् लिपा लिपा नं अमेरिकां निर्वाचित प्रतिनिधियात वास्ता मयासें वा थीथी कथंया विवाद ब्वलंकाः निर्वाचित प्रतिनिधियात हे बेवास्ता यानाः थःपिनि कथपुतली सरकार तयार यायेगु ज्या धमाधम जुयावनीगु खनेदु । उकिं नं अमेरिकी साम्राज्यवाद बिरुद्ध थ्व इलय् विश्वय् न्यनाच्वंगु जनजागरणयात नेपाली समाज व नेपाल सरकारं नं समर्थन याये फयेकेमाः ।
LEAVE YOUR COMMENTS