हलिं नेवाः दबूपाखें लोक साहित्य भवनयात ग्वाहालि

यल (नेपालभाषा टाइम्स) – हलिं नेवाः दबू (वल्र्ड नेवाः अर्गनाइजेसनं) लोक साहित्य भवनया निंतिं आर्थिक ग्वाहालि याःगु दु । दबूया नेपाःकवःपाखें भवन निर्माणया निंतिं झिंप्यंगू लखतका दां आर्थिक ग्वाहालि याःगु खः । वाङमय शताब्दीपुरुष सत्यमोहन जोशीया छेँय् दयेकाच्वंगु भवनया निंतिं दबूया नेपाः कवःया पदाधिकारीतपाखें वय्कःया छेँय् हे वनाः आर्थिक ग्वाहालि लःल्हाःगु खः ।

लोक साहित्य परिषद्या भवन निर्माणया निंतिं ताःई न्ह्यवंनिसें कुतः यानाच्वनादीम्ह राजितबहादुर श्रेष्ठं लसकुस यासें भवन निर्माणया निंतिं ताःई न्ह्यवंनिसें हे कुतः यानाच्वनागु खःसां ताःमलानाच्वंगु जानकारी बियादिल । लिसें वय्कलं सांसद कृष्णलाल महर्जनं सांसद विकास कोषपाखें ५० गू लाख तका ग्वाहालि यानादीवं भवन निर्माणया ज्या न्ह्याकेत ताःलाःगु खँ कनादिसें आः हलिं नेवाः दबुलिं नं भवन निर्माणया निंतिं ग्वाहालि याःगु लसताया खँ जूगु धयादिल ।

उगु इलय् शताब्दीपुरुष जोशीं थःगु छेँ आः लोक साहित्यया अध्ययन व अनुसन्धान यायेत ग्वाहालि जुइगु विश्वास प्वंकादिल । लिसें वय्कलं भवन राष्ट्रिय भावनां जाःकथं तयार जुइगु विदेशं वइपिं नेवाःतय्त होटलय् च्वने म्वाःलीकथं छगू तल्ला उपलब्ध याकेगु जुइ धयादिल ।  दबूया नेपाः देय्क वःया नायः शाक्य सुरेनं लोक साहितय परिषद्या भवन निर्माणया निंतिं बियागु आर्थिक ग्वाहालि पर्याप्त मखुसां लिपा लिपा नं ग्वहालि याना वनेगु  जुइ धासें ग्वाहालि याये खंगुलिं लसता प्वंकादिल ।

सम्बन्धित बुखँ

LEAVE YOUR COMMENTS