पार्टी एकता लिपा असन्तुष्टि

येँ – संघीय समाजवादी फोरम लिसे एकता यानाः समाजवादी पार्टी नीस्वने धुनेवं तत्कालीन नयाँ शक्तिया नेतात असन्तुष्ट जूगु दु । असन्तुष्ट पुचलं बुधवाः छगू भेला याःगु दु । उगु भेलाय् पुलांम्ह सभासद कल्पना धमला, ज्ञानेन्द्र कुमाल, देवेन्द्र पराजुली, रामरिझन यादव व मदन राईपिं उपस्थित जूगु खः ।

भेलाय् ब्वति काःपिं नेतातय्सं पार्टी कमिटीयात औपचारिकताय् जक लिकुंकूगु व पार्टी एकता याये न्ह्यः सहलह मयाःगु धासें असन्तुष्टि प्वंकूगु खः । भेलाय् ब्वति काःपिनि दथुइ पार्टी एकता बारे असन्तुष्टि दुसां नं तत्काल मेगु पार्टी वनेगु बारे छुं निर्णय मजूगु खँ धाःगु दु । थ्वहे झ्वलय् नयाँ शक्ति पार्टीया पुलांम्ह सभासद सीमा विक नेपाल कम्युनिष्ट पार्टी (नेकपा) य् प्रवेश जूगु दु ।

नेकपाया अध्यक्ष प्रचण्ड व महासचिव विष्णु पौडेलं विकयात पार्टीइ सिन्हः तिकाः दुकयादीगु खः । मेखे नयाँ शक्ति पार्टीलिसे एकता याःगु खँय् संसफोया जनजाति व खास यानाः नेवाः कार्यकर्ता दथुइ नं असन्तुष्टि ब्वलनाच्वंगु खँ सीदुगु दु ।