स्वन्हुयंकंया चीहाः संकिपा प्रशिक्षण कार्याशाला क्वचाल

येँ – नेवाः फिल्म सोसाइटीया ग्वासालय् जूगु स्वन्हुयंकं जूगु चीहाः संकिपा प्रशिक्षण कार्यशाला क्वचाल । सोसाइटीया ग्वसालय् व नेपाल सरकार चलचित्र विकास बोर्डया सहआयोजनाय् वंगु असार २९ निसें ३१ तक स्वन्हुयंकं उगु कार्याशाला जूगु खः ।

कार्याशालाय् वरिष्ठ सिने पत्रकार विजयरत्न तुलाधर ‘असंबरें’ आदिवासी चलचित्रया इतिहास व विकासलिसें चीहाः संकिपाय् आदिवासीया मुद्दा, ओस्कार कलेज अफ फिल्म स्टडिजपाखें डिप्लोमा यानादीम्ह राकेश महर्जनं चीहाः संकिपा निर्माणया शैली व सोसाइटीया महासचिवलिसें संचारकःमि विराजकाजी राजोपाध्यायं चीहाः संकिपा निर्माण प्रक्रिया बारे प्रशिक्षण बियादीगु खः ।

स्वन्हुयंकं जूगु कार्यशालाय् रुपेन्द्र श्रेष्ठ, प्रेरणा शाक्य, आराध्यलक्ष्मी खड्गी, योवन शाक्य, हरिकृष्ण दुवाल, राजाराम नापियो, सविना गोपाली, चन्दा थापा लगायतया सहभागिता दुगु खः । सोसाइटीया नायः लूजः सिंह व न्वकु दर्शनवीर शाक्यं सहजकर्ताया भूमिका म्हितादीगु कार्यशाला समापन ज्याझ्वःया मूपाहां नापं नेपाःया न्हापांगु संकिपा ‘आमा’या नायिका चैत्यदेवी सिंहं सहभागि सकसितं दसिपौ लःल्हानादीगु खः ।