सरस्वतीया पक्षय् हस्ताक्षर अभियान

येँ – चीधंगु जात धकाः क्वथा बालं मबिउगु द्वपनय् प्रहरी हिरासतय् लायेमाःम्ह बबरमहलया मय्जु सरस्वती प्रधानयात न्याय बीकेगु लागिं स्थानीय मनूतय्सं हस्ताक्षर संकलन शुरु याःगु दु । म्हीग स्थानीय मनूतय्गु छगू मुँज्यां थुकिया लागिं छगू संघर्ष समिति समेत गठन याःगु खः । उगु समितिपाखें म्हिगःनिसें हे हस्ताक्षर संकलन याःगु खः । क्वथा बालं मबिउगु द्वपनय् वय्कःयात रुपा सुनार नांयाम्ह छम्ह मिसां उजुरी तयाः स्वन्हु तक प्रहरी हिरासतय् तया बिउगु खः । थुकिं यानाः वय्कःया अपमान जूगु लिसें व्यक्तिया मानव अधिकार हनन् जूगु धासें कापतय् हस्ताक्षर कायेगु थ्व अभियान न्ह्याकूगु खः । स्वनिगःया थीथी थासय् वनाः मुंकीगु थ्व हस्ताक्षर फुक्कं सरकारयात लःल्हानाः प्रधानयात जूगु अपमानया क्षतिपूर्ति बीमाः धकाः माग यायेगु खँ अभियन्तातय्सं धाःगु दु ।