जापानया लुखा अझ हे मचाःनि

येँ – नेपाःया ज्यामितय्त जापानय् नं यंकीगु धकाः छुं ई न्ह्यः पिहां वःगु चर्चा साकार जुइत अझ हे यक्व ई काइतिनिगु खँ धाःगु दु । छाय्धाःसां जापानं नेपाःया ज्यामि यंकेगु धकाः घोषणा याःसां आः तक उकिया तयारीया लागिं यायेमाःगु ज्या धाःसा छुं हे न्ह्याकूगु मदुनि ।
जापानं थःगु देय्या १४ गू क्षेत्रय् ज्या याकेगु लागिं नेपाःया ज्यामित नं यंकेगु धकाः थनिं स्वला न्ह्यः छकः धाःगु खःसां उकिया लागिं यायेमाःगु ज्या धाःसा छुं हे मयाःनि ।

यदि नेपाःया ज्यामित जापान यंकेगु खःसा उमित भाषा व सीप स्यनेगु विधि छु जुइ धकाः नेपालं न्यना छ्वःगु न्ह्यसःया लिसः तकं जापानं आः तक मबिउनिगु खँ धाःगु दु । जापानपाखें थ्व घोषणा जुइधुंकाः थुकिया बारे पूवंक खँ ल्हायेत जापानया छगू पुचः नेपाः वइ धाःगु खः । तर आः तक अज्याःगु पुचः नेपाः वःगु मदुनिसा नेपाःया पुचः जापान वा धकाः सःता हःगु नं मदुनि ।

नेपाःया श्रम विभागलिसे सतीगु सूत्रं धाःसा थुकिया लागिं जापानया आन्तरिक तयारी हे आः तक सिमधःगु जुयाः नेपाःलिसे संवाद यायेगु ज्या तकं मन्ह्याःगु खः । थुकिया बारे जापान व नेपाःया सरकारी अधिकारीतय् दथुइ भिडियो कलय् जूसां वार्ता याये धाःगु नं आः तक मजूनिगु खँ धाःगु दु ।

अथे हे मलेशियालिसे नेपालं खुला न्ह्यः याःगु श्रम सम्झौता नं आः तक कार्यान्वयन मजूनिगु खँ धाःगु दु । मलेशिया वनीपिं नेपाःमितय् स्वास्थ्य व भिसा प्रक्रिया बारे खँ मिले मजुयाः थ्व सम्झौता कार्यान्वयन मजुयाच्वंगु खः । नेपाःपाखें लय् झिद्वःम्ह ज्यामि मलेशिया वनीगु खःसा वंगु दछि न्ह्यवंनिसें मलेशिया वनेगु ज्या ठप्प हे जुयाच्वंगु दु ।