चिकित्सा विधेयक पास यायेत स्वःसा मुठभेद

येँ – सभामुख कृष्णबहादुर महरां चिकित्सा शिक्षा विधेयक पारित यायेगु निंतिं थौं शान्तिपूर्ण रुपं कुतः यायेगु खँ कनादीगु दु । म्हिगः सिंहदरवारय् पत्रकारतलिसें खँ ल्हासें वय्कलं थ्व खँ कनादीगु खः ।प्रमुख प्रतिपक्षी नेपाली कांग्रेसं थः नेताया नामय् चायेकातःगु अस्पताल केन्द्र सरकार मातहत महःगु विरोधय् संसद अवरुद्ध याना वयाच्वंगु इलय् म्हिगः सभामुख महरां उगु खँ धयादीगु खः ।

सभामुख महरां अस्पतालया विषय व चिकित्साशास्त्र विधेयक बिस्क बिस्कं विषय जूगुलिं कांग्रेसं संसद अवरुद्ध यायेमाःगु आवश्यकता मदु धयादीगु खः ।सरकारं चिकित्सा शिक्षा विधेयक याकनं पारित यायेमाःगु खँ धयाच्वंगु खँ धासें महरां सत्तापक्ष व प्रतिपक्षया दथुइ सहलह पाखें सहमति मालेगु खँ कनादिल ।

‘सरकारं याकनं यायेमाल धयाच्वंगु दु, व ला माने यायेमाः, स्वये थौं छु निष्कर्ष वइ ।’ वय्कलं धयादी । मेखे नेपाली कांग्रेसया नेता गगन थापां धाःसा थौंया बैठकय् सरकारं जबर्जस्ति विधेयक पारित यायेत स्वल धाःसा मुठभेद जुइ फइगु ख्याच्वः बियादीगु दु । म्हिगः येँय् ग्वसाः ग्वःगु छगू ज्याझ्वलय् न्ववासें वय्कलं उगु ख्याच्वः बियादीगु खः ।

वय्कलं सभामुख महरां तटस्थता कायम मयात धाःसा मुठभेद जुइ धासें सभामुखया भूमिका थःपिंत चित्त बुझे मजूगु खँ कनादीगु दु ।
वय्कलं धयादी, ‘सदनय् सभामुखया भूमिका न्यायपूर्ण व विवेकपूर्ण जुइ धइगु अपेक्षा जुइ । तर सभामुखया भूमिकां थज्याःगु महसुस याये फयाच्वंगु मदु ।’

वय्कं व्यवस्थापिका संसदया सभामुख छगू अमुक पार्टीया कार्यकर्ता मखु धासें चुनावया इलय् वय्कः छगू पार्टीया नेता वा कार्यकर्ता जुइफु तर सभामुख थेंज्याःगु मर्यादित पदय् थ्यनेधुंकाः वय्कः पार्टीया नेता वा कार्यकर्ता मखु धासें सर्वस्वीकार्य भूमिका सभामुख महरां म्हिते मफुगु द्वपं नं थापां बियादीगु दु ।