ताम्रकार फुटसलया उपाधि करुणामययात

यल –  स्वक्वःगु ताम्रकार फुटसलया उपाधि करुणामय मेटल क्राफ्टं त्याकूगु दु । ताम्रकार समाज युवा तथा खेलकुद उपसमितिया ग्वसालय् जूगु कासाय् उपाधिया निंतिं वंगु शनिवाः जूगु फाइनलय् ट्राइब्रेकरय् करुणामयं फोरेगो टे«डिङयात ३–२ गोलं बुकूगु खः ।समूह चरणय् कठिन विजय प्राप्त यानाः फाइनलतक थ्यनेत सफल जूगु करुणामयया निंतिं फाइनल नं उलि सहज धाःसा मजुल ।

निर्धारित ईया कासा गोलरहित बराबरीइ क्वचाःगु खः । थ्व स्वयां न्ह्यः सेमीफाइनलय् करुणामयं बंगलामुखी फर्निचरयात १–० गोलं बुकाः फाइनलय् दुहां वःगु खःसा निगूगु सेमीफाइनलय् फोरेगों साहिल मेटल क्राफ्टयात ट्राइब्रेकरय् ३–१ गोलं बुकाः फाइनलय् दुहां वंगु खः ।

कासाय् विजेता व उपविजेता टिमयात नेपाल प्रहरीया अतिरिक्त प्रहरी महानिरीक्षक ठूले राई, समाजया अध्यक्ष रविन्द्रराज ताम्रकार, उपसमितिया संयोजक सजेश ताम्रकार, कासाया संयोजक अभिन ताम्रकार लगायतं ट्रफि, मेडल, प्रमाणपत्र व नगद सिरपाः लःल्हानादीगु खः । कासाय् करुणामयं उपाधिलिसें झिद्वः व फोरेगों न्याद्वः तका प्राप्त याःगु खः ।

भदौ २३, ३० व असोज ६ गते जूगु कासाय् थीथी झिगू औद्योगिक कम्पनीं ब्वति काःगु खः । अथे हे कासाय् लिउसन राजकर्णिकार (साहिल मेटल) उच्च गोलकर्ता, सानिध्य चित्रकार (फोरेगो) उत्कृष्ट गोलरक्षक, सुभाशिष ताम्रकार (फोरेगो) प्रेसिडेन्सिल च्वाइस, दिनेश ताम्रकार (करुणामय) उत्कृष्ट कासामि घोषित जुयादीगु खःसा वय्कःपिंत नं नगद व ट्रफि लःल्हाःगु खः । लिसें फाइनल कासाकुन्हु हे मिसातय्गु मैत्रीपूर्ण कासा नापं अण्डर–१४ व अण्डर–१० या प्रदर्शन कासा नं जूगु खः ।

सम्बन्धित बुखँ

LEAVE YOUR COMMENTS