चुनावय् नेवाः अभियन्तात

येँ (नेपालभाषा टाइम्स)-संसदीय चुनाव न्ह्यःने वयेवं राजधानी येँय् थीथी कथंया नेवाः आन्दोलनय् सक्रिय जुयाच्वंपिं अभियन्तातय् दथुइ नं उम्मेदवारी बीगु धेंधेंबल्लाः शुरु जूगु दु । थ्व झ्वलय् म्हिगः सामाजिक सञ्जालपाखें ल्वहंहिति संरक्षणया अभियानय् संलग्न अभियन्ता यादवलाल कायस्थं उम्मेदवारी घोषणा यानादीगु दु् । वय्कलं येँया क्षेत्र नं. ७ पाखें स्वतन्त्र रुपं उम्मेदवारी बीगु घोषणा यानादीगु खः ।

थ्व स्वयां न्ह्यः येँया क्षेत्र नं. ८ दपाखें सुमन साय्मि व क्षेत्र नं. ९ पाखें विद्या महर्जन श्रेष्ठं स्वतन्त्र उम्मेदवारी बीगु घोषणा यानादीगु खः ।
कायस्थं उम्मेदवारी घोषणा याःगु ७ नम्बर क्षेत्रं मेम्ह अभियन्ता रविन्द्र कुमार श्रेष्ठ व सुदय शिलाकारं नं उम्मेदवारी बीगु धकाः चर्चा जुयाच्वंगु दु । तर वय्कःपिंसं उकिया घोषणा धाःसा यानामदीनि ।

क्षेत्र नं. ७ य् जसपापाखें राजेन्द्र श्रेष्ठ, नेसपापाखें मानुषी यमि भट्टराई व माओवादी केन्द्रपाखें मुक्ति प्रधानं उम्मेदवारी बीगु तयारी यानाच्वंगु दु । थ्व स्वंगुलिं पार्टीपाखें गठबन्धन यानाः छम्हेस्यां जक उम्मेदवारी बीगु खँ दु । थन कांग्रेसं उम्मेदवारी बीगु खँ मदु । एमालेपाखें निवर्तमान मेयर विद्यासुन्दर शाक्यया नां न्ह्यःने वयाच्वंगु दु । थ्व क्षेत्रय् नेवाः उम्मेदवार यक्व जुल धकाः नं टिप्पणी जुयाच्वंगु दु ।

नेवाः सामाजिक सांस्कृतिक अभियन्तापाखें आः शैलेश शाक्य, इन्द्रकुमार तण्डुकार आदिपिंसं नं उम्मेदवारी बीगु चर्चा जुयाच्वंगु दु । थ्व नेवाः अभियन्तातय्सं स्वतन्त्रं उम्मेदवारी बीगु मयासे नेवाःतय्गु पुलांगु पार्टी नेपाः राष्ट्रिय पार्टीयात सक्रिय यानाः थ्वपाखें उम्मेदवारी बीगु कुतः यानाच्वंगु खँ नं सीदुगु दु । उकिया लागिं छुं ई न्ह्यवंनिसें थीथी चरणय् खँल्हाबल्हा जुयाच्वंगु खःसां आः तक ठोस निर्णय धाःसा जुइ मफुगु खँ सूत्रं धाःगु दु ।