सितिकं जग्गा कायेगु कानून
आवास सम्बन्धी विधेयक विरुद्ध स्वनिगःया जनता आन्दोलित
येँ – सरकारं संसदय् दर्ता याःगु ‘आवासको अधिकार सम्बन्धमा व्यवस्था गर्न बनेको विधेयक २०७५’ यात कयाः स्वनिगःया स्थानीय जनतां विरोध शुरु याःगु दु । सडक पीडित संघर्ष समितिं थुगु विधेयक नेपाःया संविधान अःखः जूगु धासें संविधानं प्रत्याभूत यानातःगु मौलिक हकया अःखः विधेयक वःगु खँ धाःगु दु ।
संघर्ष समितिया दुजः लिसें अधिवक्ता जितेन्द्र वज्राचार्यं नेपालभाषा टाइम्स लिसें खँ ल्हासें विधेयकं सरकारयात आवश्यकता जुल धाःसा छुं नं जग्गा जनतायात क्षतिपूर्ति मबिसे हे कायेफइगु कथं व्यवस्था यानातःगुलिं विधेयकं जनतायात विस्थापित यायेत अःपुगु व्यवस्था याःगु द्वपं बियादीगु दु ।
विधेयकया दफा (५) या उपदफा (३) स ‘च्वय् न्ह्यागु हे च्वयातःगु जूसां नं नागरिकयात निजया आवासं चीके न्ह्यः हे गुगुं कारणं यानाः क्षतिपूर्ति बीगु निकाय वा ई क्वःछिनाः चीकेत बाधा जुइ मखु’ धकाः न्ह्यथनातःगु दु । थुगु ऐन कथं आः सुयानं छेँ थुने माल धाःसा २०३४ सालया जग्गा अधिग्रहण सम्बन्धी नियमावली पूवंक हे उल्लंघन जूगु खँ नं अधिवक्ता वज्राचार्य कनादीगु दु ।
वय्कलं धयादी, ‘क्षतिपूर्ति ला धाःगु दु । तर गुलि गुकथं धइगु छुं हे उल्लेख जुयाच्वंगु मदु । लिसें विधेयकय् आवासया जक खँ दु जग्गाया खँ गनं नं उल्लेख जुयाच्वंगु मदु । अथे जुयाः आः आवासया क्षतिपूर्ति वःसां नं जग्गाया क्षतिपूर्ति वइ मखु । अले आवास धइगु फसय् दयेकीगु ला निश्चित रुपं मदु ।’
वय्कलं संविधानयात ऐन काटे याये मफइगु खँ कनादिसें आः ऐनं संविधान काटे यायेगु ज्या जुयाच्वंगु धासें धयादी, ‘खिचां न्ह्यप्यं संकेगु कि, न्ह्यप्यनं खिचायात संकेगु धइगु न्ह्यसः ब्वलंगु दु ।’ जनताया जग्गा प्राप्ति यायेगु खःसा संविधानय् अधिग्रहण यायेमाः धकाः न्ह्यथनातःगु दुसा आः हःगु विधेयकय् अधिग्रहण सम्बन्धी छुं हे खँ दुमथ्याःगु खँ नं वय्कलं कनादिल ।
थ्वहे झ्वलय् आदिवासी जनजाति अधिकारवादी लिसें अधिवक्ता शंकर लिम्बुं फेसबुकय् स्टाटस च्वयादीगु दु, ‘थ्व कानुन पारित याइपिं व याकीपिंसं थःगु आवास विकास ज्याय् छ्यलेत राष्ट्रयात दान बीमाः ।’वय्कलं फेसबुक स्टाटसय् च्वयादीगु दु, आवास सम्बन्धी संसदय् टेबुल जूगु विधेयकय् विकासया निंतिं लिपा क्वःजिउ कथं क्षतिपूर्ति बीगु कथं थिंका छेँ थुने फइ ।
व लिपा क्षतिपूर्ति बीमाल धाःसा मेथाय् छेँबुँ दुपिं लिसें जग्गा मदुम्ह व्यक्तियात आवास सुविधा बीम्वाःगु अर्थ लगे जुइगु कानुन यायेत्यंगु दु । थुकिया अर्थ सितिकं जनताया छेँबुँ कायेगु खः । थुुगु संसदय् दर्ता जूगु विधेयकयात कयाः संघर्ष समितिं थीथी राजनीतिक पार्टीइ लविङ यायेगु ज्या शुरु जुइधुंकूगु जानकारी नं भाजु वज्राचार्य बियादीगु दु ।
थ्वहे झ्वलय् नेपाली कांग्रेस सभापति शेरबहादुर देउवा नापलायेगु तयारी जुयाच्वंगु दुसा माइतीघर मण्डलाय् धर्ना बीगु नं तयारी जुयाच्वंगु जानकारी वय्कलं बियादिल । संघीय समाजवादी फोरमया सांसद राजेन्द्र श्रेष्ठं थुगु विधेयकया विरोधय् संशोधन प्रस्ताव नं दर्ता यानादीगु दु ।
LEAVE YOUR COMMENTS