बिस्कं बिस्कं फोहोरया लागिं बिस्कं गाडी

येँ- आः येँ महानगरपालिकां थीथी प्रकारया फोहोर मुनेगु लागिं थीथी कथंया हे ट्रक प्रयोग याइगु जूगु दु । उकिया लागिं मनपाया वातावरण व्यवस्थां विभागं तयारी यानाच्वंगु खँ धाःगु दु । विभागपाखें म्हिगः मनपाय् वःम्ह न्हूम्ह प्रमुख प्रशासकीय अधिकृत केदार न्यौपानेयात लसकुस यायेत जूगु ज्याझ्वलय् न्ववासें प्रमुख अधिकृत न्यौपानें थ्व खँ कनादीगु खः ।

आः नगरवासीया छेँय् छेँय् मुनीगु ध्वगीगु फोहोर व ध्वमगीगु फोहोर मुनेत अलग अलग हे गाडी वइगु खँ कनादिल । मनपां ध्वगीगु फोहोर मुनीगु गाडी जक सिसडोल वनीगु व ध्वमगीगु फोहोरया गाडी कवाडीयाथाय् वनाः मीगु ज्या याइगु खँ कनादिल । अथे जुल धाःसा फोहोर वाइगु न्हूगु ल्याण्डफिल नं ताःई टिके जुइगु व मेखे ध्वमगीगु फोहोर मियाः मनपायात आम्दानी नं जुइगु ग्वसाः नं वय्कलं कनादिल ।

थौंकन्हय् देशय् समृद्ध नेपाःया नारा न्ह्यानाच्वंगु दुसां सरसफाई जूसा जक देश समृद्ध जुइ धासें आः मनपां कर्पिनि गल्तीं यानाः जुइगु दोष थम्हं क्वबी मखुत, छु छु निकायं महानगरयात फोहोर यानाच्वंगु खः, व फुक्क निकाययात खबरदारी यायेगु जुइ धकाः नं कनादिल ।
थौंकन्हय् स्वनिगः दुने जक न्हिं १२०० टन फोहोर मुनेगु ज्या जुयाच्वंगु दु ।

उकी मनपाया जक फोहोर न्हिं ५५० टन दइगु खँ विभागया प्रमुख हरिकुमार श्रेष्ठं कनादिल । थ्व फुक्क फोहोर १८ किलोमिटर लँ पार यानाः सिसडोल वनीगु खःसा अन तक वनीगु लँ तकं थाय्थासय् स्यनाच्वंगुलिं गाडी यंकेत हे थाकुयाच्वंगु समस्या कनादिल ।आः बञ्चरेडाँडाय् फोहोर वायेगु लागिं शहरी विकास मन्त्रालयं ल्याण्ड फिल साइट दयेकाच्वंगु दु ।