कुलेश्वर मानन्धरया दँमुँज्या

येँ – येँ १४ वडाया ‘कुलेश्वर मानन्धर परिवारं’ मस्तय्त नेवाः भाय् ल्हाकेगु ज्यायात तिबः बीगु निंतिं परिवार दुने नेवाः भाय् ल्हाये सःपिं झिदं क्वय्यापिं मस्तय्त सिरपाः बीगु जूगु दु । शनिवाः जूगु परिवारया दँमुँज्याय् नेवाः भाय् ल्हाये सःम्ह खुदँ दुम्ह सजगता मानन्धरयात द्वःछि तकाया दां सिरपाः लःल्हाःगु खः ।

परिवारया नायः गुह्यश्वरीराज मानन्धरया सभापतित्वय् जूगु उगु दँमुँज्याया झ्वलय् सकल दुजःपिनि स्वास्थ्य परीक्षण लिसें हि जाँच नं याःगु खः । ज्याझ्वलय् न्ववासें मिसा ल्वय् विशेषज्ञ डा. रसिला अमात्यं मिसापिंसं मछालाः स्वास्थ्य परीक्षण मयासे च्वने मजिउ, इलय् परीक्षण जुल धाःसा क्यान्सर थेंज्याःगु ल्वय् नं याउँक लंके फइ धयादिल ।

ज्याझ्वलय् लसकुस यासें दुजः हरिओम मानन्धरं हिला वयाच्वंगु ईयात ध्यानय् तयाः मानन्धरतय्सं नं सामाजिक सुधार याना वने माःगु खँय् बः बियादिलसा न्वकु पञ्चकुमारी मानन्धरं परिवारया मिसा दुजःपिं नं सक्रिय जुइमाःगु खँ कनादिल । मुँज्यां सचिव रमेश मानन्धरया वार्षिक प्रतिवेदन व कोषाध्यक्ष गौतम मानन्धरया आर्थिक प्रतिवेदन नं पारित याःगु खः ।

ज्याझ्वलय् ग्वाहालि याःपिं कुलेश्वर पोली क्लिनिकया राजेन्द्र श्रेष्ठ, जन चिकित्सालयया नायः विमला मानन्धर व सगुन ब्यांक्वेटया गौतम मानन्धर लिसें स्वास्थ्य कोषयात दां ग्वाहालि यानादीपिंत हनापौ देछायेगु ज्या जूगु खःसा मेपिं दुजःपिंसं नं आर्थिक ग्वाहालि लःल्हाःगु खः ।