ब्रम्ह स्पोर्टस क्लबया सत्तहतर सम्मान

येँ(नेपालभाषा टाइम्स)- ब्रम्हु स्पोर्टस क्लबं ७७ दँ क्यनेधुंकूपिं ज्याथःजिथिपिंत छगू विशेष ज्याझ्वःया दथुइ हनेज्या याःगु दु । क्लबं येँ महानगरया ३२ गुलिं वडाया प्यम्ह प्यम्ह यानाः चय्छम्ह व १२ वडाया सकलें ज्याथःजिथिपिं यानाः मुक्कं निसः व झिंप्यम्हेसित काठमाडौं महानगरयुक्त सत्तहतर सम्मान ज्याझ्वः यासें हनेज्या याःगु खः ।

येँ महानगरपालिकालिसेया सहकार्यय् जूगु ज्याझ्वलय् सकलें ज्याथःजिथिपिंत नेवाः परम्पराकथं ख्यें सगं बियाः दोसल्ला न्ययेकाः हनापौ देछासे हनेज्या याःगु खः ।
मूपाहांकथं झायादीम्ह येँ महानगरपालिका १२ वडाअध्यक्ष बालकृष्ण महर्जनं सम्मानित ज्याथःजिथिपिंत हनापौ देछानादीगु खःसा क्लबया अध्यक्ष सगुनमान श्रेष्ठं दोसल्ला न्ययेकादीगु खः ।

ब्रम्ह स्पोर्टस क्लबया संस्थापक दुजःलिसें ज्याथःम्ह व्यक्ति सानुकाजी वज्राचार्ययात दकलय् न्हापां हनेज्या यासें न्ह्यःगु ज्याझ्वः क्लबया नायः श्रेष्ठया सभापतित्वय् जूगु खःसा न्वकु सन्देश मानन्धरं लसकुस यानादीगु खः ।

क्लबया ग्वसालय् थुकथं ७७ दँ पुलेधुंकूपिंत हनेज्या याःगु थ्व स्वक्वःखुसी खः । थ्व स्वयां न्ह्यः क्लबं २०५६ साल व वयां लिपा २०७१ सालय् नं थुकथं हनेज्या यायेधुंकूगु दु ।