न्हूदँया ज्याझ्वः स्थगित

येँ – नेपाल संवत् ११३९ न्हूदँया लसताय् जुइगु सम्पूर्ण ज्याझ्वः स्थगित जूगु दु । नेपाल संवत् आन्दोलनया प्रणेता लिसें आदिवासी जनजाति आन्दोलन व मानव अधिकार आन्दोलनया न्ह्यलुवा भाजु पद्मरत्न तुलाधर मदुगुलिं वय्कः प्रति सम्मान प्वंके कथं थुगुसी जुइगु न्हूदँया सम्पूर्ण ज्याझ्वः स्थगित याःगु खः ।

थौं मंगलवाः च्वंगु नेपाल संवत् न्हूदँ राष्ट्रिय समारोह समितिया मुँज्यां थ्व निर्णय याःगु खः । मुँज्या लिपा न्हूदँ समारोह समितिं जारी याःगु प्रेस वक्तव्यया पूर्ण विवरण थथे दु –

नेपाल संवत् आन्दोलनया प्रणेता लिसें आदिवासी जनजाति आन्दोलन व मानव अधिकार आन्दोलनया न्ह्यलुवा भाजु पद्मरत्न तुलाधर मत्यवं मदुगु कारणं शोक स्वरुप नेपाल संवत् ११३९ न्हूदँया लसताय् जुइगु सम्पूर्ण ज्याझ्वः स्थगित जूगु दु ।

थौं ने.सं. ११३८ कौलागा १४ (कात्तिक २० गते) मंगलवाः कुन्हु च्वंगु नेपाल संवत् न्हूदँ राष्ट्रिय समारोह समितिया मुँज्यां उगु निर्णय याःगु खः । दँय्दसं थें थुगुसी नं नेपाल संवत् ११३९ न्हूदँया लसताय् थ्वहे वइगु ने.सं. ११३९ कछलाथ्व पारु (कात्तिक २२ गते) कुन्हु येँया बसन्तपुली न्हूदँया मू समारोह यायेगु ज्याझ्वः क्वःजीधुंकूगु खः ।

मदुम्ह भाजु तुलाधर प्रति सम्मान देछाये कथं वकुन्हुया ज्याझ्वः स्थगित याःगु खः । वकुन्हु हे ग्वसाः ग्वइगु मेमेगु थाय्या ज्याझ्वः नं स्थगित याःगु दु । स्थगित जूगु ज्याझ्वःत मदुम्ह भाजु तुलाधरया झिंस्वन्हुया पूण्यतिथि लिपा मेगु अनुकुल न्हि कुन्हु ग्वसाः ग्वयेगु निर्णय नं बैठकं याःगु दु ।

भाजु तुलाधर मदुगु शोकय् तोखाया न्हूदँ ज्याझ्वः स्थगित जूगु दुसा थिमिइ शंखधर साख्वाःया शालीकय् स्वांमाः क्वखायेकेगु ज्या जक यायेगु निर्णय जूगु दु । किपुली बाजं मथासे ¥याली पिकाइगु जूगु दु ।

सम्बन्धित बुखँ

LEAVE YOUR COMMENTS