स्वनिगलय् सम्पदा संरक्षण अभियान

येँ – स्वनिगःया सम्पदा ल्यंकेगु निंतिं छगू अभियान न्ह्याकेगु तयारी जुयाच्वंगु दु । सरकारं दयेकेत्यंगु खोनाया फास्ट ट्राय्कय् पुरातात्विक वस्तु लुया वयेवं स्थानीय वासिन्दां सहलह यानाः आः स्वनिगः न्यंकं हे सम्पदा संरक्षण अभियान न्ह्याकेगु तयारी जुयाच्वंंगु खँ सेभ नेपाल भ्यालीया संयोजक असोज महर्जनं ‘नेपालभाषा टाइम्स’ यात कनादीगु दु ।

अभियान वइगु सोमवाः निसें न्ह्याइगु खँ धाःगु दु । अभियानया झ्वलय् स्वनिगःया फुक्कं नगरपालिकाया मेयरपिंत नं दुथ्याकेगु तयारी जुयाच्वंगु दु । अभियानय् आः तत्काल यल महानगरपालिका, येँ महानगरपालिकाया हनुमानध्वाखा दरवार क्षेत्र, ख्वप दरवार क्षेत्र, टोखा नगरपालिका स्थानीय वासिन्दा नाप सहलह यानाः अभियान न्ह्याकेत्यंगु खः ।

थ्वहे झ्वलय् खोनाय् लुयावःगु सम्पदा संरक्षण यायेगु निंतिं यल महानगरपालिकाया २१ वडां माःगु बजेट विनियोजन याःगु दु । लिसें अन निरन्तर उत्खनन् नं यायेगु तयारी जुयाच्वंगु जानकारी नं भाजु महर्जनं बियादीगु दु । उत्खनन् यायेत स्थानीय वासिन्दायात क्लास बीगु ज्याझ्वः नं तयातःगु दु । पुरातत्वविद् डा. रमेश ढुंगेलं उगु क्लास बीगु खँ सीदुगु दु ।