मेलम्चीं थप लः हयेगु योजना लिबाइगु संकेत

येँ – मेलम्ची आयोजनापाखें थप ३७ करोड लिटर लः येँय् हयेगु ज्या लिबाइगु संकेत पिहां वःगु दु । आयोजनां याग्री व लार्के खुसीपाखे थप लः हयेगु योजना दयेकातःगु खः । थ्व योजना कथं मुआब्जा इनेगु निंतिं सुचं पिकाःसां नं स्थानीय जनतां धाःसा मुआब्जा काः मवःगुलिं आयोजना हे लिबाइगु संकेत पिहां वःगु खः ।

जिल्ला प्रशासन ज्याकुथिं वंगु जेठ ३२ गते सुचं जारी यानाः झिंन्यान्हुया दुने मुआब्जा काःवा धकाः धाःगु खः । तर नं स्थानीय जनतां आः तक नं मुआब्जा काःमवःगु खँ धाःगु दु । मेलम्चीं थप लः हयेगु खँय् राजनीतिक कारणं यानाः स्थानीय जनतां मुआब्जा काःमवःगु खँ प्रमुख जिल्ला अधिकारी गोमादेवी चेम्जोङं कनादीगु दु ।

वय्कःया कथं स्थानीय जनता मुआब्जा कायेत तयार दुसां नं सरोकार समितिं हे मुआब्जा कायेगु ज्या पनातःगुलिं मुआब्जा कायेत स्थानीय जनतां अलमल यानाच्वंगु खः । स्थानीय सरोकार समितिं जग्गाया मुल्यांकन चित्त बुझे मजू धासें असन्तुष्टि प्वंकाः जिल्ला प्रशासन ज्याकुथी ज्ञापन पौ बियातःगु दु ।

तर प्रमुख जिल्ला अधिकारी चेम्जोङं थःम्हं हे जग्गाया मूल्यांकन यानागुलिं मुआब्जायात कयाः पुनरावलोकन याये मफइगु खँ धयादीगु दु । लिसे वय्कलं मुआब्जाय् चित्त बुझे मजूसा मन्त्रालय वनेत नं थम्हं सुझाव बियागु खँ कनादीगु दु । सरकारं थप लः हयेगु निंतिं ३८० रोपनी जग्गा अधिग्रहण यायेत्यंगु खः ।

आयोजनं थुगु दँय् प्रवेश मार्ग दयेकेगु निंतिं १५ करोड तका बजेट फ्यानातःगु दु । मुआब्जा विवाद क्वमचाःगुलिं यानाः आयोजन लिबाये फइगु खँ आयोजनाया प्रवक्ता राजेन्द्रप्रसाद पन्तं कनादीगु दु । आयोजनाया डीपीआर तयार जुइधुंकूगु दु । परामर्शदाता कम्पनी इप्टिसां याग्री व लार्के खुसीया लः मेलम्ची हयेगु कथं डीपीआर तयार यानाः मेलम्ची खानेपानी विकास समितियात बीधुंकूगु दु ।

लिसें वातावरणीय प्रभाव मुल्यांकन (ईआईए) या प्रतिवेदन नं तयार जुयाः सार्वजनिक सुनुवाई यायेगु ज्या जुयाच्वंगु दु । जग्गा अधिग्रहण, डीपीआर व ईआईए प्रतिवेदन स्वीकृत जुइधुंकाः वित्तिय स्रोत व्यवस्थापन ज्या क्वचायेकाः आयोजना न्ह्याकेगु निंतिं टेन्डर वनी ।

तर जग्गा विवादं यानाः गबलय् टेन्डर जुइ धकाः धाये मफयाच्वंगु खँ आयोजनां धाःगु दु । मेलम्चीया लः येँय् तक हयेगु निंतिं ३० अर्ब तक खर्च जुइगु प्रारम्भिक अनुमान दु । एसियाली विकास बैंकं आयोजनाय् लगानी यायेत तयार दुगु खँ धाःगु दु ।